საგარეო საქმეთა მინისტრმა ანდრეი სიბიჰამ განაცხადა, რომ პოლონეთის უმაღლეს სახელმწიფო ჯილდოს დაუბრუნებდა მას შემდეგ, რაც პოლონეთის პრეზიდენტმა კაროლ ნავროცკიმ უკრაინის პრეზიდენტისთვის თეთრი არწივის ორდენის ჩამორთმევა გადაწყვიტა.

მინისტრმა ამის შესახებ Facebook-ზე განაცხადა.

სიბიჰამ ნავროცკის ნაბიჯი სტრატეგიულ შეცდომად შეაფასა, საიდანაც მხოლოდ მოსკოვი ისარგებლებს.

„ვწუხვართ, რომ ვარშავაში ემოციებმა გაიმარჯვა და პოლონელი პოლიტიკოსები აიძულა, გაეკეთებინათ გაუმართლებელი, იმპულსური და უარმყოფელი ნაბიჯები არა მხოლოდ პრეზიდენტ ზელენსკის, არამედ, უპირველეს ყოვლისა, უკრაინის სახელმწიფოს წინააღმდეგ. ასეთი დაუფიქრებელი ქმედებების ფონზე, ვერ ვხედავ გზას, შევინარჩუნოთ პოლონეთის რესპუბლიკის უმაღლესი სახელმწიფო ჯილდო, რომელიც 2022 წლის ოქტომბერში მომენიჭა - პოლონეთისთვის დამსახურების ორდენის მეთაურის ჯვარი ვარსკვლავით. მალე მას პოლონეთს დავუბრუნებ“, - წერს სიბიჰა.

მან განაცხადა, რომ საკითხი არ ეხება ორდენებს, არამედ დამოკიდებულებას და უკრაინა ყოველთვის ემხრობოდა ურთიერთპატივისცემის მიდგომას - თუნდაც რთულ და პრობლემურ საკითხებთან დაკავშირებით. „და ეს გულისხმობს, რომ ჩვენ პატივს ვცემთ ერთმანეთის გადაწყვეტილებებს, მაშინაც კი, როცა მათ არ ვეთანხმებით. „ჩვენ ვეთანხმებით, რომ არ ვეთანხმებით“, როგორც ამბობენ. ჩვენ არასდროს გვინდოდა ეს კონფლიქტი. ამის ნაცვლად, წელიწადნახევრის განმავლობაში აქტიურად ვმუშაობდით წინააღმდეგობების გადაჭრაზე, ისტორიული საკითხების დეპოლიტიზებაზე, პროფესიული და აკადემიური საქმიანობის განბლოკვაზე, პოლონური მხარის მოთხოვნით სამძებრო და ექსჰუმაციის სამუშაოების ჩატარებასა და ხელახლა დაკრძალვაზე და ისტორიკოსთა კონგრესის საქმიანობის განახლებაზე. ამ გზაზე ბევრს მივაღწიეთ. პოლონელების მოთხოვნით, ჰუტა პიენიაცკაში სამძებრო სამუშაოები ამჟამად მიმდინარეობს“, - აღნიშნა სიბიგამ.

ამ ყველაფრის ფონზე, ამჟამინდელი ესკალაცია კონტრპროდუქტიული და არასაჭიროა როგორც უკრაინელებისთვის, ასევე პოლონელებისთვის, დასძინა მან.

„ვწუხვართ, რომ გადაწყვეტილებების ძიების ნაცვლად, პოლონურმა მხარემ გადაწყვიტა ეს ესკალაცია მიუღებელ და შეუფერებელ დონეზე გადაეყვანა. სხვა ქვეყნის არცერთი პრეზიდენტი არ გვიკარნახებს ჩვენს ისტორიას“, - განაცხადა სიბიგამ.

მან იმედი გამოთქვა, რომ საბოლოოდ გაიმარჯვებს საღი აზრი და მისი პოლონელი მეგობრები დაუბრუნდებიან თანასწორ დიალოგს, რომელიც შეესაბამება ქვეყნებს შორის მოკავშირეურ ურთიერთობას მოსკოვში საერთო მტერთან დაპირისპირების ფონზე.

19 ივნისს, პოლონეთის პრეზიდენტმა კაროლ ნავროცკიმ გადაწყვიტა, უკრაინის პრეზიდენტ ვოლოდიმირ ზელენსკის ჩამოერთმია თეთრი არწივის ორდენი იმის გამო, რომ მან უკრაინის შეიარაღებული ძალების ერთ-ერთ დანაყოფს „UPA-ს გმირები“ უწოდა.

ავტორი: ექსპრესნიუსი,

სოციალური ქსელები

კობახიძე - სიძულვილის ენის წინააღმდეგ ბრძოლის სამმართველო შეასრულებს განსაკუთრებულ როლს, რომ თავი დავიცვათ სიძულვილისგან, აგრესიისგან

სიკორსკი ზელენსკიზე ორდენის ჩამორთმევაზე - ისტორიულ-ორდენების ომის გამარჯვებული შეიძლება იყოს მხოლოდ მოსკოვი

ტუსკი ზელენსკითვის თეთრი არწივის ორდენის ჩამორთმევაზე - პუტინს ახარებს და შოკში აგდებს ჩვენს მოკავშირეებს

ბუდანოვმა ნავროცკის გადაწყვეტილების შემდეგ პოლონეთიდან ჯილდო დააბრუნა