აჭარის მთავრობის თავმჯდომარემ ტრადიციული რეწვის პავილიონი დაათვალიერა

2016-08-24 22:27:01, 732 ნახვა

საზოგადოება

დღეს ევროპის მოედანზე ტრადიციული რეწვის ნიმუშების გამოფენა-გაყიდვა გაიმართა. სპეციალურ პავილიონში წარმოდგენილი გამოფენა მთავრობის თავმჯდომარემ ოჯახთან ერთად დაათვალიერა. გამოფენა განსაკუთრებულ მნიშვნელობას ატარებდა, რადგან ტრადიციული რეწვის ნიმუშები თანამედროვე ბაზრის შესაბამისად იყო წარმოდგენილი და ასეთი პროდუქციის შექმნაში აჭარაში მცხოვრებ ტრადიციული რეწვის ოსტატებს სპეციალურად მოწვეული ექსპერტები დაეხმარნენ.

გამოფენა-გაყიდვა წელს პირველად, აჭარის ავტონომიური რესპუბლიკის განათლების, კულტურისა და სპორტის სამინისტროს ინიციატივით „სოფლად მცხოვრები ტრადიციული რეწვის ოსტატების პროდუქციის განვითარების პროექტის" ფარგლებში განხორციელდა. პროექტში ამ ეტაპზე ტრადიციული რეწვის 20-ზე მეტი ოსტატი იყო ჩართული აჭარის ყველა მუნიციპალიტეტიდან.

სექტემბრის თვეში აღნიშნული პროდუქცია უკვე ქალაქ თბილისში გამოიფინება. რეწვის ოსტატებს უკვე ჩაუტარდათ ბაზარზე ორიენტირებული პროდუქციის განვითარების 5 ტრენინგი. გარდა ამისა, პროექტის ფარგლებში ჩატარდა ბაზარზე ორიენტირებული პროდუქციის განვითარების 4 დარგობრივი ვორკშოპი (სხვადასხვა მიმართულებით: კერძოდ, ხის მხატვრული დამუშავება, წნული, ქსოვა, ქარგვა, სამკაულების დამზადება და სხვა)

აღნიშნულ ტრენინგებსა და ვორკშოპებზე დაყრდნობით ტრადიციული რეწვის პროდუქციის განახლებული ხაზი (დიზაინი, ფუნქციური ჯგუფები) შეიქმნა. აღნიშნულ პროექტს ახორციელებს ტენდერში გამარჯვებული კომპანია - „საქართველოს ტრადიციული რეწვის ასოციაცია".

(NS)