გია ხუხაშვილი: პრეზიდენტის ამოცანაა, წინასაარჩევნოდ სამოქალაქო პასუხისმგებლობის ამაღლებას შეუწყოს ხელი

2016-08-10 13:30:32, 653 ნახვა

პოლიტიკა

პრეზიდენტის ამოცანაა, წინასაარჩევნოდ სამოქალაქო პასუხისმგებლობის ამაღლებას შეუწყოს ხელი, - ასე აფასებს ექსპერტი გია ხუხაშვილი საქართველოს პრეზიდენტის, გიორგი მარგველაშვილის განცხადებას, რომელმაც აღნიშნა, რომ დღეიდან ამომრჩევლის გააქტიურების მიზნით, საარჩევნო კამპანიას იწყებს.

„პრეზიდენტის მოქმედების არეალი კონსტიტუციით შეზღუდულია. თავისი მოღვაწეობის პერიოდში, პრეზიდენტს არ აქვს უფლება, მიკერძოებული იყოს. წინააღმდეგ შემთხვევაში, ეს იქნება გიორგი მარგველაშვილის მხრიდან საკუთარი ფუნქციების არასწორი გაგება. მისი ერთადერთი ამოცანაა, წინასაარჩევნოდ სამოქალაქო პასუხისმგებლობის ამაღლებას შეუწყოს ხელი. მარგველაშვილს შეუძლია, რომ საკუთარი ღირებულებების სისტემა ქონდეს, მაგრამ ის მთელი ქვეყნის პრეზიდენტია და იმ ადამიანებსაც უნდა სცეს პატივი, ვინც მის აზრებს არ იზიარებს“, - აცხადებს ხუხაშვილი.

შეგახსენებთ, რომ საქართველოს პრეზიდენტმა გიორგი მარგველაშვილმა ამომრჩევლის გააქტიურების მიზნით, საარჩევნო კამპანია დაიწყო. როგორც მარგველაშვილმა „მაესტროს” ღამის ეთერში განმარტა, კამპანია არც ერთი პოლიტიკური პარტიის მხარდასაჭერი არ იქნება.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან