ახალი ბაგა-ბაღების მშენებლობა, დედაქალაქის მასშტაბით, ინტენსიურ რეჟიმში მიმდინარეობს. 
თბილისის მერიის პრესსამსახურის ინფორმაციით, თბილისის მერმა დავით ნარმანიამ გლდანსა და ნაძალადევში მშენებარე საბავშვო ბაღები დღეს თბილისის ბაგა-ბაღების მართვის სააგენტოს დირექტორთან, თემურ თორდინავასთან და რაიონების გამგეობების თანამშრომლებთან ერთად დაათვალიერა და კონკრეტული დავალებები გასცა. ამ დროისთვის, თბილისის სხვადასხვა რაიონში 6 ახალი საბავშვო ბაგა-ბაღის მშენებლობა მიმდინარეობს. ბაღების ნაწილი ექსპლუატაციაში გაზაფხულზე, ნაწილი კი წლის ბოლომდე შევა. 2016 წლის დასაწყისში გაიხსნა კიდევ ერთი ახალი - 128-ე საბავშვო ბაღი, რომელშიც, დამატებით, 500 ბავშვი დარეგისტრირდა.  

„წარმატებით ვასრულებთ ჩვენს დაპირებას ახალი საბავშვო ბაღების მშენებლობასთან დაკავშირებით. 6 ბაღიდან 3 უკვე პრაქტიკულად დასრულებულია და მხოლოდ და მხოლოდ შიგნიდან აღჭურვას, დაკომპლექტებას საჭიროებს რაც აპრილის ბოლომდე დამთავრდება და 15 მაისამდე 3 ბაღში უკვე შემოვიყვანთ აღსაზრდელებს. დანარჩენი 3 ბაღიც ამ გაზაფხულზე დასრულდება, ასევე, აღიჭურვება და სექტემბრისთვის, როცა ახალი სასწავლო წელი დაიწყება, შესაბამისად, დამატებით 3 ბაღში კიდევ შევლენ აღსაზრდელები. გარდა ამისა, წლევანდელი გეგმის ფარგლებში, 10 ახალი საბავშვო ბაღის მშენებლობა დაიწყება, რომელთა საპროექტო სამუშაოებიც მიმდინარეობს, ტერიტორიები შერჩეული და გადაცემულია ბაღების სააგენტოსთვის. მნიშვნელოვანია ის, რომ მომდევნო წლისთვის კიდევ 10 ახალი ბაღი შეემატება ჩვენს ქალაქს“, - განაცხადა თბილისის მერმა დავით ნარმანიამ. 

აღსანიშნავია, რომ გასულ წლებში თბილისში სხვადასხვა მიზეზით 50-მდე ბაგა-ბაღი დაიხურა, რაც ბაღებში თავისუფალი ადგილების დეფიციტის მიზეზად იქცა. შესაბამისად, თბილისის ბაგა-ბაღების მართვის სააგენტო წინა წლებში დახურული საბავშვო ბაგა-ბაღების აღდგენა-რეკონსტრუქციასაც ახორციელებს. უკვე გაიხსნა დახურული 132-ე ბაღი და 109-ე ბაღის დახურული ფლიგელი, უახლოეს კვირებში ფუნქციონირებას განაახლებს ზემო ფონიჭალაში მდებარე 206-ე საბავშვო ბაღიც, რომელშიც აღსაზრდელთა 8 ჯგუფი გაიხსნება, მთლიანობაში კი, ბაღი 300-მდე ბავშვის სკოლამდელი განათლებით უზრუნველყოფას შეძლებს.  

ბაღების მშენებლობა, აღდგენა და რეკონსტრუქცია პირველ რიგში იმ რაიონებში დაიგეგმა, სადაც მოთხოვნა განსაკუთრებით დიდი იყო. უახლოეს პერიოდში გაიხსნება გლდანში მდებარე ახალაშენებული ბაგა-ბაღიც, რომელშიც დღეს თბილისის მერთან ერთად რაიონის გამგებელი ბესიკ ქარცივაძეც იმყოფებოდა.  გარდა ამისა, 2016 წელს დედაქალაქში 10 ახალი საბავშვო ბაგა-ბაღის მშენებლობა დაიწყება. ახალი საბავშვო ბაგა-ბაღები ადაპტირებულია სპეციალური საჭიროებების მქონე ბავშვებისთვის. 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ნიკა გვარამია: ჩვენ სრული გეოპოლიტიკური კატასტროფის წინაშე ვდგავართ

არაღჩი: თეირანი გააგრძელებს მონაწილეობას პაკისტანის მიერ წარმოებულ მედიაციის ძალისხმევაში

POG: მუქარის განხორციელების ფაქტზე ლაზარე გრიგორიადისს ბრალდება წარედგინა

ვაშინგტონმა კიდევ ერთხელ განაცხადა, რომ რუსული ნავთობის წინააღმდეგ სანქციების შემსუბუქებას არ გააგრძელებს