აშშ-თან სტრატეგიული პარტნიორობის 10 წლის იუბილის აღნიშვნისას ორიოდე დღის წინ ხელი მოეწერა ახალ დეკლარაციას, რომელიც წარმოუდგენელ შესაძლებლობებს ქმნის ორივე ერისთვის, ჩვენ ბევრი მიღწევა გვაქვს ეროვნული უსაფრთხოების ნაწილში და ახლა დადგა ეკონომიკური მიმართულების წამოწევის დრო, - ამის შესახებ საქართველოს პრემიერ-მინისტრმა მამუკა ბახტაძემ დალასის მსოფლიო ურთიერთობათა საბჭოსთან შეხვედრისას განაცხადა.

პრემიერმა სიტყვით გამოსვლისას დამოუკიდებლობის აღდგენიდან დღემდე საქართველოს მიღწევებზე ისაუბრა და აღნიშნა, რომ განსაკუთრებული გარდაქმნა ბოლო წლების განმავლობაში განხორციელდა.

"დემოკრატიის მშენებლობისკენ მიზანმიმართული სვლა მოიცავს სასამართლო სისტემას, რომელიც ქმედითად მუშაობს; წარმომადგენლობით დემოკრატიას, რომელიც ანგარიშვალდებულია ამომრჩევლების წინაშე. ამ რეფორმების შედეგად საქართველო იქცა მსოფლიოში ბიზნესის კეთების ყველაზე მარტივ ქვეყანად. მნიშვნელოვანი კაპიტალდაბანდება განვახორციელეთ ხალხში და თანამედროვე ინფრასტრუქტურაში, რითაც რეგიონის ეკონომიკურ ცენტრად ჩამოვყალიბდით. ჩვენი ძალისხმევის შედეგად ნატო-სა და ევროკავშირში გაწევრიანების ზღურბლზე ვიმყოფებით. ყველა მნიშვნელოვანი მაჩვენებელი ცხადყოფს, რომ სწორი მიმართულებით მივდივართ: თავისუფალი პრესიდან ეკონომიკურ ზრდამდე, რომელიც წელს დაახლოებით 6% იქნება, ადამიანურ კაპიტალში ინვესტიციებამდე და სხვა.  იმის გათვალისწინებით, რომ საქართველო რთულ სამეზობლოში იმყოფება, ჩვენ პოზიტიურ გამონაკლისად მივიჩნევით და ყველა მეზობელი ქვეყნისთვის სანიმუშო მაგალითი ვართ. ყოველივე ამის შედეგად მნიშვნელოვანი ოდენობის პირდაპირი უცხოური ინვესტიციები მოვიზიდეთ", - განაცხადა პრემიერ-მინისტრმა.

მთავრობის მეთაურმა ყურადღება გაამახვილა აშშ-თან ორმხრივ ურთიერთობაზე, რომელიც დღეს უმაღლეს ნიშნულზეა და ხაზი გაუსვა ორმხრივი სავაჭრო-ეკონომიკური კავშირების გააქტიურების მნიშვნელობას.

"გვსურს, მეტი ამერიკული კომპანია ვიხილოთ საქართველოში და მეტმა ამერიკულმა კომპანიამ გამოიყენოს პლატფორმად საქართველო სამყაროს ჩვენს ნაწილში სავაჭრო ურთიერთობებისა და პროდუქციის რეალიზაციისთვის, ვინაიდან ეს მსოფლიოში ყველაზე სწრაფი ტემპით მზარდი სამომხმარებლო ბაზარია", - აღნიშნა მამუკა ბახტაძემ.

სიტყვით გამოსვლის შემდეგ, საქართველოს პრემიერ-მინისტრმა მსოფლიო ურთიერთობათა საბჭოს წევრების კითხვებს უპასუხა.

გამოსვლის დასასრულს, მამუკა ბახტაძეს, დალასის მერის, მაიკ როულინგსის სახელით, დალასის საპატიო მოქალაქის წოდება მიანიჭეს.

ავტორი: ლუკა ცარციძე, ექსპრესნიუსის რეპორტიორი 2019 წლიდან

სოციალური ქსელები

ცაჰალის ცნობით, მოკლეს ჰამასის მეთაური აბუ მუსტაფა, რომელიც 7 ოქტომბრის თავდასხმასთან იყო დაკავშირებული

ვაშინგტონმა და თეირანმა გადაწყვიტეს ჰორმუზის სრუტის გავლით უსაფრთხო გადაადგილების მექანიზმის შემუშავება

ყატარში, მსოფლიოში უდიდეს თხევადი ბუნებრივი აირის წარმოების ცენტრში აფეთქება მოხდა, 54 ადამიანი დაშავდა

ყირიმში, ნავთობბაზისა და ბორნის დაბომბვის შემდეგ, მათ შეწყვიტეს საწვავის გაყიდვა და დახურეს ქერჩის გადასასვლელი