ლევან ბოძაშვილი უშიშროების საბჭოს მდივნის მოადგილედ დაინიშნა

2015-06-15 14:04:35, 377 ნახვა

პოლიტიკა

საქართველოს პრეზიდენტის განკარგულებით N15/06/01 2015 წლის 15 ივნისიდან ლევან ბოძაშვილი ეროვნული უშიშროების საბჭოს მდივნის მოადგილედ დაინიშნა.

ლევან ბოძაშვილი 2014 წლიდან სახელმწიფო საკონსტიტუციო კომისიის წევრი, ადგილობრივი თვითმმართველობისა და ტერიტორიული მოწყობის სამუშაო ჯგუფის ხელმძღვანელია.

2014 - 2015 წლებში მუშაობდა უზენაესი სასამართლოს თავმჯდომარის ბიუროს უფროსის თანამდებობაზე.

2012 წლის ოქტომბრიდან არის ნიუ-იორკის ფორდჰემის უნივერსიტეტის სამართლის სკოლის მიწვეული პროფესორი და მკვლევარი. კითხულობს ლექციებს შედარებით კონსტიტუციურ სამართალში. 2006 წლიდან დღემდე აკადემიური საქმიანობა მოიცავს ლექციების კურსებს თბილისის სახელმწიფო უნივერსიტეტში, ქართულ-ამერიკულ უნივერსიტეტსა და საზოგადოებრივ საქმეთა ინსტიტუტში (ჯიპა) კონსტიტუციურ სამართალში, ევროპული კავშირის სამართალსა და საგარეო ურთიერთობებში, დიპლომატიურ და საკონსულო სამართალში, კიბერსამართალში.

ლევან ბოძაშვილი წლების განმავლობაში მუშაობდა სამართლებრივ და დიპლომატიურ სფეროებში, ასევე საერთაშორისო ორგანიზაციებში, კერძოდ, ევროკავშირში სამართლებრივ მრჩევლად, სადაც მიღებული აქვს ევროკავშირის უმაღლესი წარმომადგენლის საგარეო ურთიერთობებში ჰავიერ სოლანას უმაღლესი შეფასების ჯილდო და წერილობითი მადლობა. ასევე მუშაობდა, გაეროსა და ეუთოში, ევროპის საბჭოსა და ადამიანის უფლებათა ევროპულ სასამართლოში სტრასბურგში. იყო ევროპის საბჭოს ვენეციის კომისიის წევრი 2004-2008 წლებში.

2005-2009 წლებში იყო საგარეო საქმეთა მინისტრის მოადგილე ევროკავშირისა და ორმხრივი ევროპული მიმართულების კოორდინაციის სფეროში, ევროპულ საქმეთა დეპარტამენტის დირექტორი, მუდმივი წარმომადგენლის მოადგილე და საგანგებო და სრულუფლებიანი დესპანი ავსტრიასა და ვენაში აკრედიტებულ საერთაშორისო ორგანიზაციებში. საერთაშორისო სამართლებრივი დეპარტამენტის დირექტორი და სახელმწიფო წარმომადგენელი ადამიანის უფლებათა ევროპულ სასამართლოში იუსტიციის სამინისტროში 2003-2004 წლებში. სამსახურებრივი სტაჟირებით იმყოფებოდა აშშ უზენაეს სასამართლოში 1996-1997 წლებში, საქართველოს საკონსტიტუციო სასამართლოსა და საქართველოს უზენაეს სასამართლოში სხვადასხვა თანამდებობებზე.

2005-2009 წლებში იყო დელეგაციის ხელმძღვანელი და აწარმოებდა ორმხრივ პოლიტიკურ კონსულტაციებსა და მოლაპარაკებებს დიდ ბრიტანეტთან, საფრანგეთთან, ბელგიასთან, ჰოლანდიასთან, შვეიცარიასთან, საბერძნეთთან, თურქეთთან, ირლანდიასთან, ჩეხეთთან. ასრულებდა ელჩის მოვალეობას ეუთოსა და ვენაში აკრედიტებულ საერთაშორისო ორგანიზაციებში, რომლის ფარგლებშიც მიყავდა მუდმივი საბჭოსა და გაერო-ს ორგანოების სხდომები. არის გაეროს ადამიანის უფლებათა ექსპერტი და იყო გაეროს განვითარების პროგრამების დირექტორი.
განათლება: თბილისის სახელმწიფო უნივერსიტეტი, საქართველო - სამართლის მაგისტრი, საერთაშორისო სამართლისა და საერთაშორისო ურთიერთობების ფაკულტეტი. 1996წ.
ევროპის კოლეჯი, ბრიუგე, ბელგია - ევროკავშირის საგარეო პოლიტიკის მაგისტრი, 2007 წ.
ქართულ-ამერიკული უნივერსიტეტი, საქართველო - დოქტორანტურა 2011 - დღემდე.
გავლილი აქვს სხვადასხვა კურსი და ტრენინგი ნიდერლანდებში, აშშ-ში, ნორვეგიასა და საფრანგეთში კონფლიქტოლოგიის, საერთაშორისო ურთიერთობების, მოლაპარაკების ტექნიკისა და დიპლომატიის საკითხებზე. იყო მსოფლიოს ახალგაზრდული გაეროს გენერალური მდივანი.
სადისერტაციო თემები: სამაგისტრო - ევროკავშირის კრიზისების მართვის მექანიზმის ეფექტურობა კონფლიქტების მოგვარებაში; სადოქტორო - სუვერენიტეტის შეზღუდვის ფარგლები ევროკავშირის სამართალში.
გამოქვეყნებული აქვს 6 წიგნი სამართლის საკითხებზე, მათ შორის ადამიანის უფლებათა ევროპულ სამართალში, კიბერსამართალში, ევროკავშირის სამართალსა და კონსტიტუციურ სამართალში. ასევე არის მრავალი საგაზეთო და სამეცნიერო სტატიის ავტორი.
ფლობს ინგლისურ, ფრანგულ და რუსულ ენებს.