„ ცვლილებით,  რომელსაც იუსტიციის სამინისტრო გვთავაზობს, რეალურად არ იდგმება ნაბიჯები ლიბერალიზაციისკენ, ეს არის საკონსტიტუციო სასამართლოს აღსრულება, რომელიც ეხება მხოლოდ მარიხუანას“, - ამის შესახებ ნარკოპოლიტიკასთან დაკავშირებით  ''ევროპული საქართველოს'' წევრმა ოთარ კახიძემ პარლამენტის პლენარულ სხდომაზე განაცხადა.

ამასთან, კახიძე კონკრეტულად Birja Mafia-ს წევრების საქმესაც გამოეხმაურა და ბერა ივანიშვილის „ფეისბუქ“ სტატუსის კონტექსტში,  არაფორმალურ მმართველობას გაუსვა ხაზი.

„რაც შეეხება რაიმე ფუნდამენტურ ცვლილებას, ნარკოპოლიტიკის ცვლილებას, ეს წარმოდგენილ პაკეტში ასახული არ არის. ''ევროპული საქართველო“ მიიჩნევს, რომ მთავარი, რაზეც უნდა ვკონცენტრირდეთ, თვითნებობის შეზღუდვაა, ვინაიდან პრობლემა, რომელიც ჩვენ დავინახეთ რეპერების საქმეზე, ეს არის მტკიცებულებათა ფალსიფიკაცია, ეს არის ცენზურა, გამოხატვის თავისუფლების შეზღუდვა. ამ მიმართულებით არის გადასადგმელი ნაბიჯები და ყველაზე მნიშვნელოვანი საკითხი, რომელიც ნათლად წარმოჩნდა, ეს არის არაფორმალური მმართველობა, როდესაც პროკურატურის მოქმედება,  უმაღლესი თანამდებობის პირების განცხადებები დამოკიდებულია არაფორმალური მმართველის შვილის ბერა ივანიშვილის ''ფეისბუქ '' სტატუსებზე. ეს არის აქ ფუნდამენტური საკითხი“,-განაცხადა ოთარ კახიძემ.

შეგახსენებთ, Birja Mafia-ს წევრებს გიორგი ქებურიასა და მიხეილ მგალობლიშვილს თბილისის საქალაქო სასამართლომ წინასწარი პატიმრობა შეუფარდა. მათ სამართალდამცავები დიდი ოდენობით ნარკოტიკული საშუალება MDMA-ს შეძენა-შენახვას ედავებიან. რეპერები აცხადებდნენ, რომ ნარკოტიკი ჩაუდეს და რეალურად, მათზე შური კლიპის გამო იძიეს, სადაც პოლიციელი გააშარჟეს. დაცვის მხარემ პირველი ინსტანციის სასამართლოს გადაწყვეტილება აპელაციის წესით გაასაჩივრა, ხოლო ამ უკანასკნელმა ისინი გირაოს სანაცვლოდ პატიმრობიდან გაათავისუფლა. სასამართლო პროცესამდე, რეპერების მხარდამჭერი სტატუსი გამოქვეყნა „ფეისბუქზე“ ყოფილი პრემიერის, ბიძინა ივანიშვილის შვილმა ბერა ივანიშვილმა. „ბირჟა მაფიას“ წევრებისთვის საპატიმრო აღკვეთის ღონისძიების არასაპატიმრო ღონისძიებით შეცვლას სასამართლოზე პროკურატურაც დაეთანხმა. უფრო მეტიც, პროცესის შემდეგ, პროკურორმა თქვა, რომ ბრალდების საქმეში არსებული მტკიცებულებები ნაწილობრივ ეჭვქვეშ დადგა. მუსიკალურ ჯგუფ „ბირჟა მაფიას“ წევრმა გიორგი ქებურიამ გათავისუფლების შემდეგ განაცხადა, რომ ნარკოტიკული საშუალების ფიზიკურად ჯიბეში ჩადება არ მომხდარა, არამედ აღნიშნული საბუთებში გააფორმეს. მან ასე თქვა, რომ ბერა ივანიშვილთან შეხება ჰქონია.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

iFact: სანქცირებული ტანკერის ტვირთი ყულევის პორტში ჩავიდა

პარლამენტმა სახელმწიფო ქონება იმპორტზე აქციზის გადასახადისგან გაათავისუფლა

რუსეთმა შეერთებულ შტატებს ევროპიდან ყველა ბირთვული იარაღის გაყვანა მოსთხოვა

პუტინის ბირთვული მუქარის შემდეგ ნატოს ქვეყნებმა რეკორდული ტემპით ჩადეს ინვესტიციები ბირთვულ იარაღში