ტრამპი: მნიშვნელობა არ აქვს ყავისფერები ვართ თუ თეთრები, ჩვენში პატრიოტების წითელი სისხლი ჩქეფს

2017-01-20 21:14:49, 2549 ნახვა

მსოფლიო

მნიშვნელობა არ აქვს ჩვენ ყავისფერები ვართ თუ თეთრები, ჩვენში პატრიოტების წითელი სისხლი ჩქეფს, - ამის შესახებ აშშ-ის 45-ე პრეზიდენტმა დონალდ ტრამპმა ფიცის დადების შემდეგ სიტყვით გამოსვლისას განაცხადა.

როგორც აშშ-ის არჩეულმა პრეზიდენტმა აღნიშნა, დღევანდელ ცერემონიალს ძალიან მნიშვნელოვანი დატვირთვა აქვს. მისივე თქმით, დღეს ვაშინგტონიდან ძალაუფლება გადადის ხალხში.

„დღევანდელ ცერემონიალს ძალიან მნიშვნელოვანი დატვირთვა აქვს, დღეს ჩვენ არ გადავცემთ ძალაუფლებას ერთი ადმინისტრაციიდან მეორეში და არც ერთი პარტიიდან მეორე პარტიაში, ჩვენ გადაგვაქვს ძალაუფლება ვაშინგტონიდან თქვენთან, ხალხში. მნიშვნელობა არ აქვს, თუ რომელი პარტია მართავს ქვეყანას, მთვარი ის არის, რომ ქვეყანას მართავს ხალხი. 2017 წლის 20 იანვარი ისტორიაში შევა, როგორც დღე, როდესაც ადამიანებმა ქვეყნის მართვა დაიწყეს“, - აღნიშნა ტრამპმა.

სიტყვით გამოსვლისას არჩეულმა პრეზიდენტმა სამომავლო გეგმებზე ისაუბრა და აღნიშნა, რომ ამერიკა რადიკალური ისლამური ტერორიზმის წინააღმდეგ გაერთიანდება.

„ჩვენ სხვა ქვეყნებთან კარგ ურთიერთობას ჩამოვაყალიბებთ, თუმცა ვიცით, რომ ყველა ერისთვის პირველ რიგში თავისი ინტერესებია მნიშვნელოვანი. არ ვაპირებთ ჩვენი აზრი ვინმეს მოვახვიოთ, მაგრამ სამაგალითო გაბრწყინებას ვაპირებთ და ეს იქნება ისეთი მაგალითი, რომ ყველას მოუნდება გაყოლა. ჩვენ გავერთიანდებით რადიკალური ისლამური ტერორიზმის წინააღმდეგ. ბოლო ამოსუნთქვამდე თქვენთვის ვიბრძოლებ და არასდროს მოგცემთ საშუალებას, ხელი ჩაიქნიოთ. ამერიკა ისევ გამარჯვებული იქნება, ისეთი გამარჯვებული, როგორც არასდროს, დავიბრუნებთ ჩვენს სამუშაო ადგილებს, დავიბრუნებთ ჩვენს საზღვრებს და დავიბრუნებთ ჩვენს ოცნებებს“, - დასძინა 45-ე პრეზიდენტმა.

როგორც ტრამპმა აღნიშნა, ამერიკას ვერაფერი შეაჩერებს. არჩეულმა პრეზიდენტმა სიტყვით გამოსვლისას აღნიშნა, რომ ხშირად პოლიტიკოსები წუწუნებენ, მაგრამ არაფერს აკეთებენ სიტუაციის შესაცვლელად. მისივე თქმით, მათ ეს სიტუაცია უნდა შეცვალო, რადგან მოქმედების დროა.

„ჩვენ ღმერთი გვიცავს, ამერიკას არაფერი არ შეაჩერებს, ჩვენ ვიარსებებთ იქამდე, სანამ ვართ მდიდრები. ძალიან ხშირად გაგვიგია, როცა პოლიტიკოსები წუწუნებენ, მაგრამ არაფერს აკეთებენ სიტუაციის შესაცვლელად, ჩვენ ეს სიტუაცია უნდა შევცვალოთ. მოვიდა მოქმედების დრო და წუწუნს თავი უნდა დავანებოთ. არავის მისცეთ იმის უფლება, რომ გითხრან - ეს შეუძლებელია. თუ ამერიკელები გაერთიანდებიან ჩვენ ყველაფერს შევძლებთ. მნიშვნელობა არ აქვს ჩვენ ყავისფერები ვართ, თეთრები, ჩვენში პატრიოტების წითელი სისხლი ჩქეფს. ჩვენ ყველანი ვცხოვრობთ იმ დროშის ქვეშ, რომელსაც აშშ-ის დროშა ჰქვია. ყველა ამერიკელს, სადაც არ უნდა იყვნენ, მივმართავ, რომ თქვენ ყოველთვის მოგისმენენ და არასდროს იქნებით იგნორირებულნი. თქვენი სურვილები ჩვენი ქვეყნის მომავალს განაპირობებენ. ჩვენ ისევ შევქმნით ამერიკას დიდებულს, ჩვენ ამას ერთად გავაკეთებთ, ღმერთი ფარავდეს ამერიკას და თითოეულ თქვენგანს“, - განაცხადა დონალდ ტრამპმა.