ბელარუსის საგარეო საქმეთა მინისტრმა საოკუპაციო ხაზთან მდებარე სოფელი მოინახულა

2016-12-21 11:28:45, 1277 ნახვა

საზოგადოება

საქართველოში ორდღიანი ოფიციალური ვიზიტით მყოფი ბელარუსის საგარეო საქმეთა მინისტრი ვლადიმირ მაკეი საოკუპაციო ხაზისგ ასწვრივ მდებარე სოფელ ხურვალეთს ეწვია. საქართველოს საგარეო უწყების ინფორმაციით, ვლადიმირ მაკეი ადგილზე გაეცნო რუსეთის საოკუპაციო ჯარის მიერ მავთულხლართების და სხვა ხელონური ბარიერების აღმართვის შედეგად შექმნილ რთულ ჰუმანიტარულ ვითარებას. ბელარუსის საგარეო უწყების ხელმძღვანელი ასევე შეხვდა ადგილობრივ მოსახლეობას და მათი პრობლემების შესახებ მოისმინა.

„მნიშვნელოვანი იყო, რომ გავცნობოდი შექმნილ ვითარებას. არ ვისურვებდი არც ჩემი ქვეყნის და არც თქვენი ქვეყნის მიწაზე ისეთი ბარიერების დანახვას, რომლებიც ადამიანებს აბრკოლებს მოინახულონ ახლობლები, დაეხმარონ დაავადებულ ნათესავებს, გადაარჩინონ ადამინები ან იცხოვრონ ჩვეულებრივად. ამიტომ ჩვენ ყველაფერი უნდა ვიღონოთ იმისთვის, რომ ჩვენს რეგიონებში სუფევდეს მშვიდობა და სტაბილურობა"-აღნიშნა ბელარუსის საგარეო საქმეთა მინისტრმა.

ვლადიმირ მაკეი საქართველოს ოფიციალური ვიზიტით 2016 წლის 19-20 დეკემბერს ეწვია.

ბელარუსის საგარეო საქმეთა მინისტრმა შეხვედრები გამართა საქართველოს აღმასრულებელი და საკანონმდებლო ხელისუფლების წარმომადგენლებთან, ასევე მონაწილეობა მიიღო საქართველოში ბელორუსის საელჩოს გახსნის საზეიმო ცერემონიაში.