ევროსაბჭომ საქართველოში ევროკავშირის სადამკვირვებლო მისიის მანდატი 2018 წლის 14 დეკემბრამდე გაახანგრძლივა

2016-12-12 15:35:15, 1410 ნახვა

პოლიტიკა

ევროკავშირის საბჭომ საქართველოში ევროკავშირის სადამკვირვებლო მისიის მანდატი 2018 წლის 14 დეკემბრამდე გაახანგრძლივა, - ამის შესახებ ინფორმაცია ევროკავშირის ოფიციალურ ვებგვერდზეა გამოქვეყნებული.

როგორც ევროკავშირის მიერ გავრცელებულ განცხადებაშია ნათქვამი, საბჭომ 18 მილიონი ევროს ოდენობის რესურსი, 2016 წლის 15 დეკემბრიდან 2017 წლის 14 დეკემბრამდე პერიოდისთვის გამოყო.

ევროკავშირის მისია საქართველოს ტერიტორიაზე 2008 წლის სექტემბერში გამოიგზავნა. ეს მას შემდეგ მოხდა, რაც აგვისტოს ომი ხელმოწერილი 6-პუნქტიანი შეთანხმების საფუძველზე დასრულდა.

მას შემდეგ, რაც მისიამ საქმიანობა დაიწყო, იგი ახორციელებს 24-საათიან პატრულირებას და განსაკუთრებულ ყურადღებას ე.წ. სამხრეთ ოსეთისა და აფხაზეთის ადმინისტრაციული საზღვრების მიმდებარე ტერიტორიებს უთმობს.

ცნობისთვის, მისიის წარმომადგენლობის ოფისი თბილისში მდებარეობს და 3 ქვეოფისი გორში, მცხეთაში და ზუგდიდში გააჩნია. მისიაში 200-მდე დამკვირვებელია ჩართული.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან