პრემიერი: საკონსტიტუციო უმრავლესობა უდიდესი პასუხისმგებლობაა და ასეთ მხარდაჭერას ბუნებრივია ჰქონდა საკუთარი მიზეზები

2016-10-29 20:29:26, 620 ნახვა

პოლიტიკა

საკონსტიტუციო უმრავლესობა უდიდესი პასუხისმგებლობაა და ასეთ მხარდაჭერას ბუნებრივია ჰქონდა საკუთარი მიზეზები, - ამის შესახებ საქართველოს პრემიერ-მინისტრმა გიორგი კვირიკაშვილმა "იმედის" პირდაპირ ეთერში განაცხადა.

როგორც მან აღნიშნა, კმაყოფილების მრავალი მიზეზი აქვს, რადგან "ქართული ოცნება" ახლოს დგას საკონსტიტუციო უმრავლესობასთან.

მისივე განცხადებით, პარტიას ნდობის ასეთი მაღალი მაჩვენებელი ბევრ რამეზე მიუთითებს.

„კმაყოფილი ვართ ამ შედეგით. ვფიქრობ, რომ ნდობა გამოგვიცხადა ამომრჩეველმა უბრალოდ, ჩვენ 50 პროცენტამდე ავწიეთ მაჟორიტარულ ოლქებში მინიმალური ბარიერი და სწორედ ამის გამოა, რომ უმრავლესობა ჩვენს კანდიდატს მეორე ტურში უწევს მონაწილეობის მიღება. უმეტესობას ჰქონდა 47 და 49%-იანი მხარდაჭერა, ამიტომ მე ვფიქრობ, რომ ეს დემოკრატიის კიდევ ერთი გამოხატულებაა და მე დიდი იმედი მაქვს, რომ ჩვენი ამომრჩეველი იაქტიურებს. ისეთი შეგრძნება შეიქმნა მთლიანად ქვეყანაში რომ ჩატარდა არჩევნები, არჩევნები არ დასრულებულა. ისევე როგორც პირველ ტურში ახლაც მნიშვნელოვანია მისვლა და გამოხატვა საკუთარი პოზიციის. მე დიდი იმედი მაქვს, რომ ხვალ ამომრჩეველი იაქტიურებს და ისეთივე ან იმაზე უფრო მაღალი დასწრება იქნება მეორე ტურზე. კითხვაზე, კმაყოფილი ვარ თუ არა, შესაძლებელია ბევრნაირად ვუპასუხო. მე ვფიქრობ, რომ კმაყოფილების მრავალი მიზეზი მაქვს, რადგან ჩვენ ახლოს ვართ საკონსტიტუციო უმრავლესობასთან. ეს არის ძლიერი მანდატი მოსახლეობისგან , რაც უდიდესი პასუხისმგებლობაა და ასეთ მხარდაჭერას ბუნებრივია ქონდა საკუთარი მიზეზები“, - აღნიშნა გიორგი კვირიკაშვილმა.