პაპავა არჩევნებზე: არჩევნები ჩატარდა მშვიდ გარემოში, ყველა პროცედურის დაცვით

2016-04-20 21:34:35, 789 ნახვა

სამართალი

"არჩევნები ჩატარდა მშვიდ გარემოში, ყველა პროცედურის დაცვით" - ასე შეაფასა თსუ-ს ყოფილმა რექტორმა ვლადიმერ პაპავამ რექტორის მოვალეობის შემსრულებლის არჩევნები.

თსუ-ს ყოფილმა რექტორმა თბილისის სახელმწიფო უნივერსიტეტის რექტორის მოვალეობის შემსრულებელ დარეჯან თვალთვაძეს წარმატება უსურვა და აღნიშნა, რომ არჩევნებმა დარღვევების გარეშე ჩაიარა, რაც უნივერსიტეტისთვის ამ ვითარებაში ძალიან მნიშვნელოვანია.

"ეს არის უნივერსიტეტის ისტორიაში განსაკუთრებული დღე, რადგან ჩვენს უნივერსიტეტში პირველად, რექტორის მოვალეობის შემსრულებლის არჩევნებში მონაწილეობის მიღების უფლება მიეცა 1300-ზე მეტ ამომრჩეველს. ეს არის ძალიან მასშტაბური არჩევნები და უნივერსიტეტმა აჩვენა, რომ მას შესწევს უნარი ყველაზე რთულ სიტუაციაშიც კი ვითარებას გაუმკლავდეს ისე, როგორც შეშვენის ივანე ჯავახიშვილის და მისი თანამოაზრეების მიერ დაფუძნებულ უნივერსიტეტს. მთავარია, რომ არჩევნები ჩატარდა მშვიდ გარემოში, ყველა პროცედურის დაცვით, რომ არ დარღვეულა არაფერი, რაც დააფიქსირეს დამკვირვებლებმა და ეს არის ყველაზე მთავარი შედეგი. უნივერსიტეტმა აჩვენა, რომ მას შეუძლია ჩაატაროს ასეთი არჩევნები, თუმცა კურიოზია კანონში რაც წერია, რომ რექტორის მოვალეობის შემსრულებელს ირჩევდეს მთელი უნივერსიტეტი და რექტორს მხოლოდ აკადემიური საბჭო", - განაცხადა ვლადიმერ პაპავამ.