2024-12-09 14:28:37, 510 ნახვა

---

პაპუაშვილი - მიმდინარე კვირაში პიროტექნიკის რეგულაციის საკითხებს განვიხილავთ - საკითხზე საკანონმდებლო ინიციატივა უკვე არსებობს

მიმდინარე კვირაში პიროტექნიკის რეგულაციის საკითხებს განვიხილავთ - ეს იქნება შემოტანა-რეალიზაციის საკითხები,- ამის შესახებ პარლამენტის თავმჯდომარე შალვა პაპუაშვილმა ბრიფინგზე განაცხადა.

როგორც პაპუაშვილმა აღნიშნა, პიროტექნიკის საკითხთან დაკავშირებით საკანონმდებლო ინიციატივა უკვე არსებობს.

„ჩვენ მიმდინარე კვირაში განვიხილავთ პიროტექნიკის რეგულაციის საკითხებს. ეს იქნება შემოტანა-რეალიზაციის საკითხები, რაზეც დიდი ხანია, მიმდინარეობს საუბარი, მათ შორის, წინა მოწვევის პარლამენტში. ამ მოვლენებმა გვაჩვენა, თუ რამდენად მნიშვნელოვანია ეს სფერო იყოს მოწესრიგებული. სხვათაშორის, ამაზე საუბრობდნენ გასულ წლებში ადამიანები, რომლებიც წუხდნენ ფრინველებზე თუ ცხოველებზე. გახსოვთ, ახალს წელს მოგვიწოდებდნენ, არ ყოფილიყო პიროტექნიკის გამოყენება იმისთვის, რომ გავფრთხილებოდით ფრინველებს. როგორც ჩანს, ბოლო ერთი კვირაა ის ადამიანები, რომლებიც მოგვიწოდებდნენ, მათთვის რუსთაველზე გულგახეთქილი ჩიტები ნაკლებად მნიშვნელოვანი აღმოჩნდა, იმდენად მაღალ მატერიებს ემსახურებიან თავის წარმოდგენით. ეს რეგულაციები დიდი ხანია არის პარლამენტში და ამ მოვლენებმა გვაჩვენა, რომ მნიშვნელოვანია, ვიმოქმედოთ სწრაფად, როგორც პიროტექნიკის რეგულაციის საკითხებში, ისე საჯარო შეკრებების დროს შენიღბვის აკრძალვაში. ამ საკითხთან [პიროტექნიკასთან] დაკავშირებით საკანონმდებლო ინიციატივა უკვე არსებობს“,- განაცხადა პაპუაშვილმა.

შეგახსენებთ, გუშინ 8 დეკემბერს, საქართველოს პრემიერ-მინისტრმა, ირაკლი კობახიძემ განაცხადა, რომ მომავალი კვირის ბოლომდე მმართველი გუნდი მიიღებს კანონს, რომლის მიხედვითაც, შეკრებაზე შეკრების მონაწილეების მიერ, მათ შორის კონტრშეკრების მონაწილეების მიერ, სხვადასხვა საშუალებით სახის დაფარვა აიკრძალება. კობახიძის ინიციატივას გამოეხმაურა შინაგან საქმეთა მინისტრის მოადგილე ალექსანდრე დარახველიძე, რომლის განცხადებითაც, შინაგან საქმეთა სამინისტრო პრემიერ-მინისტრის ინიციატივას შეკრება-მანიფესტაციებზე ე.წ. ნიღბების აკრძალვის თაობაზე მიესალმება.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი