თბილისის მერმა დავით ნარმანიამ აღმაშენებლის ხეივნიდან მუხათგვერდისკენ გადასასვლელი ესტაკადა დაათვალიერა.

ღონისძიებას, მერთან ერთად, მოადგილეები ლაშა აბაშიძე და გიორგი ლილუაშვილი, კეთილმოწყობის საქალაქო სამსახურის უფროსი გივი კუბლაშვილი, საბურთალოს რაიონის გამგებელი ბექა მიქაუტაძე  და თბილისის საპატრულო პოლიციის მთავარი სამმართველოს უფროსი დავით მიქიაშვილი ესწრებოდნენ.

მერიის ინფორმაციით, გზაგამტარზე  პროექტით გათვალისწინებული სარეაბილიტაციო სამუშაოები დასრულდა. კერძოდ: აღდგა  განაპირა ბურჯები და ხიდის ძირითადი კონსტრუქცია, მოეწყო ახალი სავალი ნაწილი, გაკეთდა ჰიდროიზოლაცია და ბეტონის დამცავი ფენა. საექსპლოატაციო ვადის გახანგრძლივებისთვის მოეწყო ასფალტის ახალი საფარი. დამონტაჟდა განათების ახალი  ქსელი ხიდისა და პანდუსებისთვის; შეიცვალა ხიდზე არსებული (ძველი) მოაჯირები და აშენდა ფრანგული კედელი.

თბილისის მერის დავით ნარმანიას განცხადებით, ხიდი წინასაარჩევნო დაპირების შესაბამისად გაკეთდა და გაიხსნა.

მისივე თქმით, ახალი ესტაკადა მოქალაქეებს საშუალებას მისცემს  შეუფერხებლად გადაადგილდნენ აღმაშენებლის ხეივნიდან დიდი დიღმისა  და დიდი დიღმის საუნივერსიტეტო დასახლების მიმართულებით.

„ჩვენი წინასაარჩევნო დაპირების შესაბამისად, რომელიც ამ უბნის მოსახლეობას მივეცით, გავხსენით ხიდი, რომელიც 25 წელზე მეტია გაჩერებულია. ამით ორი ძალიან მნიშვნელოვანი საქმე გაკეთდა. პირველი ის, რომ განიმუხტება მოძრაობა დიდი დიღმის შესახვევთან, ასევე პროექტი უსაფრთხოების თვალსაზრისითაც ძალიან მნიშვნელოვანია, ვინაიდან ხშირი იყო ავტოავარიები. ამდენად განიტვირთება ქალაქის ეს ნაწილი  და უბანი, რომელიც სულ უფრო მეტად იზრდება, ფართოვდება და შესაბამისად ავტოსატრანსპორტო ნაკადების რაოდენობა იმატებს, რა თქმა უნდა, მიღწევადობის თვალსაზრისით იქნება გაცილებით უფრო კომფორტული“,-განაცხადა დავით ნარმანიამ.

სარეაბილიტაციო სამუშაოები შ.პ.ს „ზიმომ“ შეასრულა. პროექტზე დედაქალაქის ბიუჯეტიდან 2.188.965 მლნ ლარი დაიხარჯა.

აღმაშენებლის ხეივნიდან მუხათგვერდისკენ გადასასვლელი ესტაკადა გასული საუკუნის სამოცდაათიან წლებში აშენდა, ფუნქციონირება მალევე შეწყვიტა და მას შემდეგ რეაბილიტაცია არ ჩატარებია.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ვაშინგტონმა კიდევ ერთხელ განაცხადა, რომ რუსული ნავთობის წინააღმდეგ სანქციების შემსუბუქებას არ გააგრძელებს

ზელენსკიმ რუსეთსა და უკრაინას შორის მოლაპარაკებების აზერბაიჯანში გამართვა შესთავაზა

მაკრონი: ევროპელებმა უნდა აღიარონ, რომ აშშ, ჩინეთი და რუსეთი ახლა ჩვენს წინააღმდეგ არიან

ზელენსკი აზერბაიჯანში ალიევთან შესახვედრად ჩავიდა