მარგველაშვილი: ტრაგიკულად დაღუპულმა პოლიციელებმა უნდა იცოდნენ, რომ მათი თავდადებისთვის მადლიერი ვართ

2015-02-10 17:22:23, 681 ნახვა

პოლიტიკა

საქართველოს პრეზიდენტი გიორგი მარგველაშვილი დღეს ბორჯომში შინაგან საქმეთა სამინისტროს სამცხე-ჯავახეთის სამხარეო მთავარი სამმართველოს ბორჯომის რაიონული სამმართველოს უბნის ინსპექტორ-გამომძიებლის გიორგი ბერუაშვილის დაკრძალვას დაესწრო.
გიორგი მარგველაშვილმა დაღუპული პოლიციელის ოჯახსა და ახლობლებს მიუსამძიმრა.
„ვუსამძიმრებ გიორგის ოჯახს და მის კოლეგებს. მინდა მადლობა გადავუხადო ყველა პოლიციელს, რომელიც გვიცავს თითოეულ ჩვენგანს, იცავს ჩვენს სიმშვიდეს. სამწუხაროა, რომ ზოგიერთი მათგანის სიცოცხლე ასე ტრაგიკულად სრულდება; მათ უნდა იცოდნენ, რომ ჩვენ მადლიერი ვართ მათი თავდადებისათვის და პატივს ვცემთ მათ ღვაწლს“, - განაცხადა ქვეყნის პირველმა პირმა.
დაკრძალვაზე შინაგან საქმეთა მინისტრი ვახტანგ გომელაურიც იმყოფებოდა, რომელმაც გარდაცვლილის ოჯახს მიუსამძიმა და აღნიშნა, რომ მის გადასარჩენად ყველაფერი გააკეთეს.
გიორგი ბერუაშვილი 23 იანვარს ლიკანში სამსახურებრივი მოვალეობის შესრულების დროს მიყენებული ჭრილობების შედეგად გარდაიცვალა.