კალაძე პოლიტსაბჭოს განცხადებაზე - რა შუაშია დაშინება, სად ნახეთ, რომ „ქართული ოცნება“ ვინმეს აშინებდეს

2023-05-29 15:15:06, 1006 ნახვა

პოლიტიკა

რა შუაშია დაშინება, სად ნახეთ, რომ "ქართული ოცნება" ვინმეს აშინებდეს?- ასე ეხმაურება თბილისის მერი კახა კალაძე პრეზიდენტ სალომე ზურაბიშვილთან დაკავშირებით "ქართული ოცნების" პოლიტიკური საბჭოს დღევანდელ განცხადებას.

კალაძის თქმით, მმართველი გუნდის მხრიდან აღნიშნული განცხადება ნიშნავს იმას, რომ პარტიაში არ უნდათ პრეზიდენტთან პოლემიკაში შესვლა.

"ნამდვილად არ შევდივარ პოლემიკაში და არ ვაპირებ შევიდე, პრეზიდენტთან, მის განცხადებებთან, იმიტომ, რომ კიდევ ერთხელ ვითვალისწინებ და ზოგადად მნიშვნელოვანია ჩვენი ქვეყნის ინტერესები და ამ ინტერესებიდან გამომდინარე არ მინდა პოლემიკაში შესვლა. რა შუაშია დაშინება, რა შუაშია შიში, სად ნახეთ თქვენ, რომ "ქართული ოცნება" ვინმეს აშინებდეს. სალომე ზურაბიშვილმა უნდა გაათავისუფლოს, არ გაათავისუფლოს [ნიკა გვარამია] ეს ჩემი გადასაწყვეტი არ არის, ეს არის მისი პრეროგატივა.

ჩვენი მხრიდან ეს განცხადება ნიშნავს იმას, რომ ჩვენ არ გვინდა პრეზიდენტთან შევიდეთ პოლემიკაში ისევ და ისევ ჩვენი ქვეყნის ინტერესებიდან გამომიდინარე და ისევ და ისევ იქიდან გამომდინარე, რომ ვუფრთხილდებით პრეზიდენტის ინსტიტუტს",- განაცხადა კალაძემ.

ცნობისთვის, დღეს, 29 მაისს "ქართული ოცნების" პოლიტიკურმა საბჭომ პრეზიდენტ სალომე ზურაბიშვილთან დაკავშირებით საგანგებო განცხადება გაავრცელა.

"უნდა დავიცვათ პრეზიდენტის ინსტიტუტი მაშინაც კი, როდესაც მას თავად მოქმედი პრეზიდენტი უქმნის საფრთხეს",- ნათქვამია პოლიტსაბჭოს განცხადებაში.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,