2022-12-13 11:33:21, 912 ნახვა

---

შსს-მ, ქალთა მიმართ ძალადობის წინააღმდეგ კამპანიის ფარგლებში, მედიის წარმომადგენლებთან სამუშაო შეხვედრა გამართა

შინაგან საქმეთა სამინისტროს და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს თანამშრომლებმა, ქალთა მიმართ ძალადობის წინააღმდეგ ბრძოლის 16-დღიანი გლობალური კამპანიის ფარგლებში, მედიის წარმომადგენლებთან სამუშაო შეხვედრა გამართეს.

ქალთა და ოჯახში ძალადობის თემების მედია გაშუქების საკითხებზე გამართულ შეხვედრაში მონაწილე პირებს სიტყვით მიმართეს შინაგან საქმეთა მინისტრის მოადგილემ - ალექსანდრე დარახველიძემ, ჯანდაცვის მინისტრის მოადგილემ - თამილა ბარკალაიამ, ასევე აშშ-ის სახელმწიფო დეპარტამენტის ანტინარკოტიკული და სამართალდამცავ ორგანოებთან თანამშრომლობის საერთაშორისო ბიუროს (INL) უფროსმა - სარა რუპერტმა.

სამუშაო შეხვედრაზე, რომელსაც სხვადასხვა მედიასაშუალების ოცამდე წარმომადგენელი ესწრებოდა, შინაგან საქმეთა სამინისტროს ადამიანის უფლებათა დაცვისა და გამოძიების ხარისხის მონიტორინგის დეპარტამენტის დირექტორმა - გიორგი ოსაძემ, ასევე სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს დირექტორმა - მერი მაღლაფერიძემ ჟურნალისტებს მიაწოდეს ინფორმაცია ქალზე ძალადობის წინააღმდეგ ბრძოლის მიმართულებით უწყებების მიერ განხორციელებული საქმიანობის შესახებ.

მედიასაშუალებების წარმომადგენლების გარდა აღნიშნულ შეხვედრაში მონაწილეობა მიიღეს ქალთა მიმართ და ოჯახში ძალადობის საკითხებზე მომუშავე შინაგან საქმეთა სამინისტროს და ჯანდაცვის სამინისტროს ყველა შესაბამისი დანაყოფის წარმომადგენლებმა.

ორდღიან სამუშაო შეხვედრაზე მონაწილეებს შესაძლებლობა ჰქონდათ დეტალურად გაცნობოდნენ და მოწვეულ ექსპერტთან ერთად განეხილათ ისეთი საკითხები, როგორიცაა: ადგილობრივი და საერთაშორისო პრაქტიკის ანალიზის საფუძველზე ძალადობის შემთხვევების ეთიკური გაშუქება, მსხვერპლზე ორიენტირებული მიდგომები, მედიის როლი გენდერული ნიშნით ჩადენილ დანაშაულებთან ბრძოლაში, ელექტრონული ზედამხედველობის საშუალების გამოყენების წესი და სხვა. ასევე, მათ ინფორმაცია მიიღეს ქალთა მიმართ ძალადობის წინააღმდეგ ბრძოლის 16-დღიანი გლობალური კამპანიის ფარგლებში, შესაბამისი სახელმწიფო უწყებების მიერ განხორციელებული აქტივობებისა და სიახლეების შესახებ.

აღნიშნული შეხვედრა შინაგან საქმეთა სამინისტროს სტრატეგიული კომუნიკაციების დეპარტამენტის ინიციატივით, ჯანდაცვის სამინისტრო აქტიური ჩართულობით, აშშ სახელმწიფო დეპარტამენტის ანტინარკოტიკული და სამართალდამცავ ორგანოებთან თანამშრომლობის საერთაშორისო ბიუროს (INL) მხარდაჭერით გაიმართა. INL საქართველოს შინაგან საქმეთა სამინისტროსთან მრავალი წელია თანამშრომლობს ოჯახში ძალადობის, არასრულწლოვანთა დანაშაულის პრევენციის, კიბერდანაშაულის და სხვა აქტუალური საკითხების მიმართულებებით.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი