მივმართავ და მოვუწოდებ საქართველოს თითოეულ მოქალაქეს, ყოფილი მაღალი თანამდებობის პირებსა და პოლიტიკოსებს, რომ თავი შეიკავონ ჩვენი ქვეყნის ინტერესების დამაზიანებელი განცხადებებისგან, - ამის შესახებ პარლამენტის ადამიანის უფლებათა დაცვის კომიტეტის თავმჯდომარე მიხეილ სარჯველაძემ განაცხადა.

მისი თქმით, „ერთიანი ნაციონალური მოძრაობა“ და მისი სრული გავლენის ქვეშ მოქმედი სხვა პოლიტიკური პარტიები, საკუთარი ქვეყნის უზენაესი ინტერესებისა და ტერიტორიული მთლიანობის უპირობო დაცვის ნაცვლად, მავნებლური პროპაგანდის გამოყენებით, ებრძვიან თავიანთ სამშობლოსა და ისტორიას.

„ჩვენ, ისევე როგორც მთლიანად საზოგადოება, საკუთარი თვალით ვხედავთ საქართველოს სახელმწიფოებრივი ინტერესების წინააღმდეგ მიმართულ აგრესიულ კამპანიას, რომლის ფარგლებშიც შურისძიების და ძალაუფლების ჟინით დაბრმავებული ჩვენი ოპონენტები დაჟინებით და ხელაღებით უმტკიცებენ ქართულ საზოგადოებას, რომ თითქოს, გარეჯი საქართველო არ არის. მსოფლიოს ნებისმიერ ცივილიზებულ ქვეყანაში, როგორი მძაფრი და უკომპრომისო არ უნდა იყოს პოლიტიკურ ოპონენტებს შორის დაპირისპირება, ყოველთვის არის აბსოლუტურად ხელშეუხებელი საკითხები, რომელთა ირგვლივაც საზოგადოების ეროვნული ერთსულოვნება ამ სახელმწიფოს არსებობის საძირკველს წარმოადგენს.

ჩვენს თვალწინ „ერთიანი ნაციონალური მოძრაობა“ და მისი სრული გავლენის ქვეშ მოქმედი სხვა პოლიტიკური პარტიები საკუთარი ქვეყნის უზენაესი ინტერესებისა და ტერიტორიული მთლიანობის უპირობო დაცვის ნაცვლად, მავნებლური პროპაგანდის გამოყენებით გამორჩეული ხალისით, მონდომებითა და მიზანდასახულობით ებრძვიან თავიანთ სამშობლოსა და ისტორიას, რათა ჩამოაყალიბონ ხალხის, როგორც ხელისუფლების ძირითადი წყაროს იმგვარი პოლიტიკური ნება, რომელიც როგორმე ბოლომდე მიიყვანს საქართველოს ძირძველი მიწების სხვადასხვა სახელმწიფოსთვის გადაცემის წლების წინ ჩაფიქრებულ გეგმას. სრული პასუხისმგებლობით ვაცხადებ, რომ მათი დაჟინებული მცდელობების მიუხედავად მმართველი პარტია არავის მისცემს ამ მოღალატეობრივი განზრახვის წარმატებით განხორციელების შესაძლებლობას. დარწმუნებული ვართ, რომ თითოეული ქართველისთვის ურთულესი საყურებელია, თუ როგორი ორგანიზებულობითა და გაშმაგებით ამტკიცებდნენ და ამტკიცებენ ყოფილი და მოქმედი ქართველი პოლიტიკოსები, ყოფილი მაღალი თანამდებობის პირები ამ გაუგონარ აბსურდს“, - განაცხადა სარჯველაძემ.

როგორც მან აღნიშნა, საქართველო აუცილებლად შეძლებს მეგობარ აზერბაიჯანთან ერთად, ქვეყნების ეროვნული ინტერესების დაცვასა და საზღვრების დემარკაცია-დელიმიტაციას პროცესის ბოლომდე მიყვანას.

„მივმართავ და მოვუწოდებ საქართველოს თითოეულ მოქალაქეს, ყოფილი მაღალი თანამდებობის პირებსა და პოლიტიკოსებს, რომ თავი შეიკავონ ჩვენი ქვეყნის ინტერესების დამაზიანებელი განცხადებებისგან და ერთი შეხედვით ხელისუფლების დაზიანების მიზნით წარმოებული აბსურდული პროპაგანდით, ნუ დააზიანებენ ქართულ სახელმწიფოს. მეზობელ და მეგობარ აზერბაიჯანთან ერთად, ჩვენ აუცილებლად შევძლებთ ჩვენი ქვეყნების ეროვნული ინტერესების დაცვას, საზღვრების დემარკაცია-დელიმიტაციას პროცესის ბოლომდე მიყვანას და მთელი ეს პროცესი აუცილებლად წარიმართება ისე, როგორც მეგობარ და პარტნიორ ქვეყნებს შორის არსებულ ურთიერთობას შეეფერება“, - განაცხადა მიხეილ სარჯველაძემ.

ავტორი: ექსპრესნიუსი,

სოციალური ქსელები

მოჯთაბა ხამენეი მამის დაკრძალვას, სავარაუდოდ, ვერ დაესწრება

5 ივლისი გაორმაგების დღეა - მომხმარებლებს 500-ზე მეტ პარტნიორ ობიექტში 50%-იანი ფასდაკლება დახვდებათ

რა წერია OHCHR-ის ანგარიშში 2025 წელს საქართველოში ადამიანის უფლებებთან დაკავშირებით

შიო III პრორუსული პარტიის ლიდერს ზურა მახარაძეს შეხვდა