ოპოზიცია ფინანსთა და სოფლის მეურნეობის მინისტრებს იბარებს

2015-09-14 17:00:30, 412 ნახვა

პოლიტიკა

საპარლამენტო უმცირესობის წევრმა მიხეილ მაჭავარიანმა ფინანსთა მინისტრი ნოდარ ხადური პარლამენტში დაიბარა.
მაჭავარიანმა ბიუროს სხდომაზე საორგანიზაციო დეპარტამენტს თხოვნით მიმართა, ბიუჯეტის 6 თვის ანგარიშთან დაკავშირებით ხადური პარლამენტში ხუთშაბათს მოიწვიოს.
„მოვისმინე აგრარულ საკითხთა და დარგობრივი კომიტეტების სხდომა 6 თვის ანგარიშზე. ამიტომ, მინდა ვთხოვო საორგანიზაციო დეპარტამენტს, რომ იქნებ შეატყობინოთ ფინანსთა მინისტრს, მობრძანდეს ხუთშაბათს უმცირესობის სხდომაზე ქუთაისში“,-განაცხადა მიხეილ მაჭავარიანმა.
უმცირესობის ამ მოთხოვნას პარლამეტის თავჯდომარე დავით უსუფაშვილი გამოეხმაურა და აღნიშნა, რომ ამ განცხადებას საორგანიზაციო დეპარტამენტი ჩაინიშნავს.
„გთხოვთ ყველას, ვისაც მსგავსი საკითხები გვაქვს მოსაგვარებელი, ბიუროს არ დაველოდოთ და პირდაპირი გზებითაც ვითხოვოთ, დრო რომ არ დავკარგოთ“-აღნიშნა სპიკერმა.
გარდა ამისა, საპარლამენტო უმცირესობა პარლამენტში სოფლის მეურნეობის მინისტრს ოთარ დანელიასაც იბარებს.
აღნიშნული მოთხოვნა ბიუროს სხდომაზე დეპუტატმა სერგო რატიანმა დააყენა.
„სოფლის მეურნეობის მინისტრიცაა მოწვეული. ჩვენ გვაქვს შეტანილი განცხადება.ამ პირობებში, მნიშვნელოვანია, რომ ის მოვიდეს პარლამენტში და გასცეს პასუხი იმ პრობლემებზე, რომლებიც არის კახეთში“-აღნიშნა სერგო რატიანმა.