ირაკლი ღარიბაშვილი: თუ გვაქვს პრეტენზია, ძლიერი სახელმწიფო ავაშენოთ, მაშინ პირველ რიგში განათლებაზე უნდა ვიზრუნოთ

2015-09-14 10:57:03, 420 ნახვა

პოლიტიკა

საქართველოს პრემიერ-მინისტრმა ირაკლი ღარიბაშვილმა მოსწავლეებს და მასწავლებლებს ახალი სასწავლო წლის დაწყება მიულოცა. ირაკლი ღარიბაშვილი მცხეთის რაიონის სოფელ წილკანის სკოლას ესტუმრა, რომელიც ახალი ხელისუფლების პირობებში აშენდა. ღარიბაშვილის თქმით, განათლება მთავრობის პრიორიტეტია.

"ჩვენი მთავრობა აკეთებს და გააკეთებს ყველაფერს, რომ ბავშვებს ჰქონდეთ კომფორტული გარემო, იყვნენ გალაღებულები. ვიცი, რომ მანამ, სანამ ეს სკოლა აშენდებოდა, იყო საკმაოდ ძველი შენობა, რომელშიც ბავშვებს უწევდათ სამ ცვლაში სწავლა. ეს დრო აღარ დაბრუნდება საქართველოში.ჩვენი მომავალი თაობა უნდა გაიზარდოს ასეთ განათლებულ, თანამედროვე სკოლებში. ჩვენ თუ გვაქვს პრეტენზია, რომ გვსურს ძლიერი სახელმწიფო ავაშენოთ, მაშინ პირველ რიგში ჩვენს განათლებაზე უნდა ვიზრუნოთ, რადგან განათლებული თაობის გარეშე ყოველგვარი წინსვლა და განვითარება არის შეუძლებელი. ვერც ეკონომიკას ვერ განვავითარებთ, ვერც სოფლის მეურნეობას, ვერც მეცნიერებას, ვერც ახალ ტექნოლოგიებს დავნერგავთ, თუ არ გვეყოლება შესაბამისად განათლებული თაობა.ჩვენთვის მართლაც პრიორიტეტულია სათანადო განათლების მიცემა ჩვენი მომავალი თაობებისთვის. ამისთვის ჩვენი მთავრობა ყველაფერს ვაკეთებთ. ამ სამი წლის განმავლობაში 1000-მდე სკოლა გავარემონტეთ. 20 ახალი სკოლა დასრულდება წლის ბოლოს",-განაცხადა ირაკლი ღარიბაშვილმა.

ამასთან, პრემიერმა ახალი ხელისუფლების პირობებში განათლების სფეროში განხორციელებულ ღონისძიებებზეც ისაუბრა:

„მესამე წელია ბავშვები უფასოდ იღებენ სახელმძღვანელოებს, კომპიუტერებს, 60 ათასი ბავშვისთვის არის ტრანსპორტი უფასო. ღირს აღნიშვნა, რომ ამ ღონისძიებებით რამდენიმე ათეული მილიონი ლარის ეკონომია გაუკეთდათ ჩვენს მშობლებს,“-აღნიშნა ირაკლი ღარიბაშვილმა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან