ბიზნესმენმა,  „ქართული ლუდის კომპანიისა“ და სხვა არაერთი წარმატებული საწარმოს დამფუძნებელმა ცეზარ ჩოჩელმა „ბანკები და ფინანსებთან“ ექსკლუზიურ ინტერვიუში იმ სირთულეებზე ისაუბრა, რასაც ბიზნესისთვის ლარის გაცვლითი კურსის არაპროგნოზირებადობა იწვევს.

მისი თქმით, ლარის გაუფასურება და მისი მოუქნელი, წინ და უკან სიარული, ანგრევს ზოგადად ბიზნესს, ხოლო წარმოებას განსაკუთრებით.

„წარმოება, ეს არ არის იყიდე დღეს და ხვალ გაყიდე. წარმოება არის გრძელვადიანი პროცესი, რომელსაც სტაბილურობა სჭირდება. როდესაც ვიგეგმებით 2.75-2.80-ზე და შემდეგ გვიწევს პროდუქციიდან შემოსავლების მიღება 3.20-ზე, ისე რომ ჩვენ პროდუქციის ფასი არ გაგვიძვირებია, გამოდის, რომ მინიმუმ, 10-12%-ს უკვე ვაგებთ კურსთაშორის სხვაობის გამო.  რომ გადავხედოთ შარშანდელ, შარშანწინდელ ფასებს, აღმოვაჩენთ, რომ თითოეულ წარმოებას, ყველა კომპანიას, კურსთაშორის სხვაობაში აქვს ზარალი. ეს არ არის პატარა რიცხვები. 3-4 მილიონია თითოეული კომპანიისთვის“, – ამბობს ჩოჩელი.

ბიზნესმენი აცხადებს, რომ მისთვის გაუგებარია დედოლარიზაციის პოლიტიკის პარალელურად ლარში სესხებზე არნახულად ძვირი საპროცენტო განაკვეთის არსებობა.

„ეროვნული ბანკი გვეუბნება, რომ მიმდინარეობს დედოლარიზაციის პოლიტიკა და რომ პრიორიტეტი ლარიზაციაა. მეტ-ნაკლებად ბიზნესმა და მოსახლეობის ნაწილმა დაიჯერა ამ პროცესის და რა მივიღეთ შედეგად, – 14-15 და მეტპროცენტიანი ბიზნესსესხები ლარში.  იძულებული ვხდებით უკან დავუბრუნდეთ დოლარს და აქ მეორე წინააღმდეგობას ვაწყდებით. დოლარში პროცენტი ნაკლებია, მაგრამ კურსის პროგნოზირების შანსი, ფაქტობრივად ნულის ტოლია. ეროვნულმა ბანკმა ბიზნესი ორ ცეცხლს შუა ჩააგდო.

სულ გვესმის, რომ ეროვნული ბანკის მანდატი არ არის ვალუტის გაცვლითი კურსი და მის სტაბილურობაზე ზრუნვა. და რომ მისი ამოცანა ინფლაციის მართვა და ფასების სტაბილურობაა. განცხადების დონეზე გასაგებია, მაგრამ როცა ეროვნული ვალუტის გაცვლითი კურსის მერყეობის და ლარის მუდმივად გაუფასურების გამო იმპორტი ძვირდება, ეს, საბოლოო ჯამში, ფასებზეც ხომ პირდაპირპროპორციულად აისახება?!.

დღესაც, რომ გადავხედოთ ბაზარს, რამდენი პროცენტით არის გაძვირებული სურსათი და პირველადი მოხმარების პროდუქცია, კარგად დავინახავთ ახდენს თუ არა გავლენას გაცვლითი კურსის მერყეობა ფასების ზრდაზე. რა თქმა უნდა, კურსის მერყეობა პირდაპირ კავშირშია ფასებთან“, – აღნიშნა ჩოჩელმა და დასძინა, რომ სანამ რეალური პრიორიტეტი არ გახდება ეროვნული წარმოება და ადგილობრივ მრეწველობას არ განვავითარებთ, მანამ ეკონომიკურ სტაბილურობას არ უნდა ველოდოთ.

ავტორი: ექსპრესნიუსი,

სოციალური ქსელები

„თეგეტამ“ რუსთავის ჭალის ტყის აღდგენისთვის გამწვანების აქცია გამართა

საპატრიარქომ იობის განათლება აღიარა და მას შესაბამისი ხარისხი მიანიჭა

აპრილში „ექსპრესნიუსი“ 1.7 მილიონჯერ წაიკითხეს, სოციალურ ქსელებში, ახალ ამბებს 11 მილიონი ადამიანი გაეცნო

რუსეთის ტერიტორიის მეოთხედი და მოსახლეობის 70% უკრაინული დრონების მოქმედების რადიუსში იმყოფება