2020-03-26 14:58:04, 1646 ნახვა

---

ბოლნისის მაჟორიტარი დეპუტატის: ყველაფერი მაქსიმალურად კეთდება იმისათვის, რომ მოსახლეობის ჯანმრთელობის მდგომარეობა და უსაფრთხოება იყოს დაცული

ბოლნისის მაჟორიტარი დეპუტატის, გოგი მეშველიანის ინფორმაციით, მუნიციპალიტეტის პერიმეტრი სრულად გადაკეტილია შინაგან საქმეთა სამინისტროს და თავდაცვის სამინისტროს მიერ. სასურსათო და სამედიცინო საშუალებებით უზრუნველყოფა მიმდინარეობს გეგმიურად. 

სამედიცინო ჯგუფები ყველა ადმინისტრაციულ ერთეულში  ინტენსიურ რეჟიმში მუშაობენ, შედიან ყველა ოჯახში და ამოწმებენ მოქალაქეების ჯანმრთელობის მდგომარეობას.

„გუშინ დაავადებათა კონტროლის ეროვნულმა ცენტრმა სპეციალური ტესტებით 13 ადამიანს აუღო ნაცხები. ეს ის ადამიანები არიან, რომლებიც კომუნიკაციაში იყვნენ მარნეულში  მცხოვრებ ქალბატონთან, რომელიც ერთ-ერთი პირველი იქნა გამოვლენილი. ამ 13 ადამიანიდან  ერთზე ჩატარებულმა ტესტირებამ  აჩვენა დადებითი პასუხი. ინფიცირებული გახლავთ ახალგაზრდა  ქალბატონი, რომელსაც პრაქტიკულად არანაირი სიმპტომი არ გააჩნდა და რომ არა ეს  გამოკვლევა, შეუძლებელი იქნებოდა ვირუსის არსებობის დადასტურება. თუმცა ეს ქალბატონიც და დანარჩენი 12-ნიც იყვნენ თვითიზოლაციაში  და შეზღუდული ჰქონდათ კონტაქტი გარე სამყაროსთან და შესაბამის რეკომენდაციებს იცავდნენ. ეს ქაბატონი გადაყვანილ იქნა სპეციალურ სამკურნალო  დაწესებულებაში, სადაც  რეგლამენტით გათვალისწინებული პროცედურები ჩაუტარდება", - განაცხადა ბოლნისის მაჟორიტარმა დეპუტატმა.

გოგი მეშველიანის ინფორმაციით, მერიასთან შექმნილი სპეციალური ჯგუფი მუშაობს სხვადასხვა საკითხებზე, რომელიც მოსახლეობას აწუხებს.

„გვაქვს ცხელი ხაზი, რომელიც 24-საათიან რეჟიმში იღებს მოქალაქეთა ზარებს და ხდება მყისიერი რეაგირება  როგორც სოციალურ, ისე გადაადგილებასთან და სამედიცინო საჭიროებასთან  დაკავშირებულ  საკითხებზე. ჩვენი თვითმმართველობა მობილიზებულია ისევე, როგორც ცენტრალური ხელისუფლების ორგანოები არიან მობილიზებულნი. ყველაფერი მაქსიმალურად კეთდება იმისათვის, რომ  ჩვენი მოსახლეობის ჯანმრთელობის მდგომარეობა და უსაფრთხოება იყოს დაცული", - განაცხადა გოგი მეშველიანმა.​

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი