"ევროპული საქართველოს" წევრის გიგა ბოკერიას შეფასებით, პრეზიდენტი სალომე ზურაბიშვილი ამერიკული ბაზების განლაგების საწინააღმდეგო განცხადებებით „მტრის წისქვილზე ასხამს წყალს“.

მისი თქმით, რუსეთისგან თავის დასაცავად, ქვეყანა პირიქით, ბაზების განლაგებისკენ უნდა მიილტვოდეს.

"ამ ადამიანის მიერ საქართველოს პრეზიდენტის სტატუსის ქონაა პროვოკაცია. სიტყვები არ მყოფნის ამის აღსაწერად. სამწუხაროდ, ამერიკის სამხედრო ბაზების თუ რომელიმე ჩვენი მოკავშირე თუ ნატოს წევრი ქვეყნის ბაზების  განლაგების საკითხი დღეს არ დგას, მაგრამ რომ იდგეს?! ან, დღეს არ დგას, მაგრამ ჩვენ მივილტვით იმისკენ, რომ დაცული ვიყოთ ჩვენი მთავარი საფრთხესგან, რუსეთისგან, რატომ შეიძლება, რომ საქართველოს პრეზიდენტი ამის წინააღმდეგი იყოს?!", - აცხადებს გიგა ბოკერია.

დეპუტატის თქმით, ისინი მსგავსი განწყობების  შესახებ წინასწარ აფრთხილებდნენ უმრავლესობას, რადგან სალომე ზურაბიშვილის მოსაზრებები მსგავს თემაზე გაპრეზიდენტებამდე იყო ცნობილი.

"სანამ პრეზიდენტს აირჩევ, მანამდე სწავლობენ ყველგან მის  პოზიციებს სხვადასხვა საკითხებზე. ჩვენ ვიცოდით მისი პოზიცია, რომ საქართველოს ტერიტორიაზე ნატოს წვრთნების წინააღმდეგი იყო, ამიტომ ვიღებთ ამ შედეგს", - აცხადებს გიგა ბოკერია.

შეგახსენებთ, სალომე ზურაბიშვილმა „ამერიკის ხმის“ ქართულ რედაქცისთან ინტერვიუში ჟურნალისტის კითხვას, თუ რას ფიქრობს საქართველოში ამერიკული სამხედრო ბაზის აშენებაზე, ასე უპასუხა: „არ მგონია ეს რეკომენდირებული იყოს. ვფიქრობ, ეს ქვეყანა ისეთ ადგილზე მდებარეობს, სადაც უსაფრთხოება უნდა გავაძლიეროთ. არაა საჭირო გადავდგათ ნაბიჯები, რომლებიც შეიძლება პროვოკაციად იქნას აღქმული და ამასთან, არ მგონია შეერთებული შტატები აქ სამხედრო ბაზის ქონისთვის მზად იყო, რაც ყურადღებას მიიქცევს არა მხოლოდ რუსეთისგან, არამედ ტერორისტული მოძრაობებისგანაც, რომლებიც ჩვენს რეგიონში ძალიან აქტიური არიან. ჩვენს შორის არსებული ურთიერთგაგების საფუძველზე, უნდა გავაღრმაოთ და გავაფართოვოთ თანამშრომლობა და არ გადავდგათ ნაბიჯები, რომლებმაც შესაძლოა სხვების რეაქციის პროვოცირება გამოიწვიოს“.

ავტორი: ექსპრესნიუსი,

სოციალური ქსელები

სააკაშვილი - გადავარჩინე ქართული სახელმწიფოებრიობა და დამოუკიდებლობა ურთულეს სიტუაციაში

მთავარეპისკოპოსი ზენონ იარაჯული - როცა გზა ეთმობა ძალმომრეობას, ეკლესია კარგავს არა მხოლოდ წესრიგს, არამედ საკუთარ არსს და იდენტობას

Turkish Airlines 18 საერთაშორისო მარშრუტზე რეისებს აჩერებს

რუბიო რომსა და ვატიკანს ეწვევა პაპთან და იტალიასთან კონფლიქტის ფონზე