აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ, ფონდ „მოძრაობა შიმშილის წინააღმდეგ“ რეგიონალურ დირექტორ მარსელა მაქსფილდთან სამუშაო შეხვედრა გამართა.

ყოლბაიამ ოკუპირებულ აფხაზეთში შავი ზღვის სანაპირო ზოლიდან და მდინარეების კალაპოტიდან დიდი რაოდენობით ინერტული მასალის გატანის შესახებ ისაუბრა, რამაც უდიდესი ზიანი მიაყენა გარემოს და რეგიონის ეკოლოგიური ვითარება დაამძიმა. 

აღინიშნა სასწრაფო ზომების მიღების საჭიროება, რათა სიტუაცია კიდევ უფრო არ დამძიმდეს და თავიდან იქნას აცილებული ეკოლოგიური კატასტროფა.
განსაკუთრებული ყურადღება გამახვილდა აზიური ფაროსანას მიერ გალის რაიონის მოსახლეობისთვის მიყენებულ ზიანზე. 

„სამწუხაროა, რომ ისედაც ეკონომიკურად დასუსტებული და უკიდურესად რთულ ვითარებაში მყოფი ქართული მოსახლეობის ფინანსური მდგომარეობა კიდევ უფრო გაუარესდა მავნებელი მწერის მიერ მოსავლის თითქმის სრულად გაანადგურებით.  საჭიროა ამ მიმართულებით ქმედითი ნაბიჯების გადადგმა და საერთაშორისო რესურსების მობილიზაცია. მნიშვნელოვანია მეგობარი ქვეყნების გამოცდილების გაზიარება. აუცილებელია მოსახლეობის ცნობიერების ამაღლება, ტრეინინგებისა და სემინარების გამართვა. ქართველი და აფხაზი სპეციალისტების მონაწილეობით გამოსავლის მოძებნა და მავნებლის დამარცხება“, -განაცხადა ვახტანგ ყოლბაიამ.

შეხვედრაზე აღინიშნა ამერიკული თეთრი პეპლის დამარცხების კუთხით გატარებული ღონისძიებები, რამაც ხელშესახებად დადებითი შედეგი გამოიღო. ეს მაგალითი იმედს იძლევა, რომ აზიური ფაროსანას წინააღმდეგ ბრძოლაც წარმატებით დასრულდება.

მთავრობის თავმჯდომარემ ხაზი გაუსვა კოლხური ბზის გადარჩენის მიზნით მიღწეულ წარმატებებს. ასევე ბზის გადარჩენის ისტორიულ მნიშვნელობას ქართველებისა და აფხაზებისთვის. სპეციალისტების მიერ სათბურში გამოყვანილი ათასამდე ბზის ნერგი სკოლის მოსწავლეებს დაურიგდებათ, რომელიც შემდგომში ქართველი და აფხაზი ახალგაზრდების მიერ აფხაზეთის მთელ ტერიტორიაზე გაშენდება.

შეხვედრას აფხაზეთის ავტონომიური რესპუბლიკის სოფლის მეურნეობის, გარემოს დაცვისა და ბუნებრივი რესურსების დეპარტამენტის თავმჯდომარე ვალერი ბასარია, აფხაზეთის ავტონომიური რესპუბლიკის მთავრობის თავმჯდომარის მრჩეველი პეტრე კანკავა და აფხაზეთის ავტონომიური რესპუბლიკის მთავრობის აპარატის საერთაშორისო და არასამთავრობო ორგანიზაციებთან ურთიერთობის სამსახურის უფროსი დავით გახარია ესწრებოდნენ.

(NS)

ავტორი: ,

სოციალური ქსელები

ნიკა გვარამია მიიჩნევს, რომ პარტიები „ლელო - ძლიერი საქართველო“ და „გახარია საქართველოსთვის“ ოპოზიციურ ალიანსში უნდა მიიღონ

ქართველი მედიკოსები დიუშენის სინდრომის მქონე ბავშვების და მათი მშობლების მხარდასაჭერად ერთიანდებიან

რუბიომ უკრაინის არმია ევროპაში ყველაზე ძლიერ არმიად მოიხსენია

კიევზე რუსეთის დარტყმას 8 ადამიანი ემსხვერპლა, 44 დაშავდა, 20 ადამიანს კი ეძებენ