კახა კალაძე: ქუჩებში სირბილი, კერძო საკუთრების დარბევა, პოლიციის შენობის შტურმით აღება დანაშაულია

2017-03-12 04:01:09, 1226 ნახვა

საზოგადოება

ქუჩებში სირბილი, კერძო საკუთრების დარბევა, პოლიციის შენობის შტურმით აღება დანაშაულია, - ამის შესახებ საქართველოს ენერგეტიკის მინისტრმა კახა კალაძემ ბათუმში მიმდინარე მოვლებზე საუბრისას განაცხადა.

მისი თქმით, პროტესტის გამოხატვა ვანდალიზმით და სამართალდამცველების დაშავებით არც ერთ ნორმალურ ქვეყანაში არ რჩება დაუსჯელი. მისივე თქმით, თუ პოლიციელების მხრიდან არის კანონის გადამეტება, არც ეს დარჩება დაუსჯელი.

"მინდა მივმართო ბათუმელებს. სიმშვიდე და კიდევ ერთხელ სიმშვიდე. მთავარია, ყველა დამშვიდდეს და მოთმინებით დაელოდოს კანონის აღსრულებას. არც ბათუმს, არც საქართველოს, არც პოლიციელებს, რომლებიც ჩვენი და კანონის სადარაჯოზე დგანან არ უნდა ვაკადროთ ასეთი არეულობა. არ უნდა აკადროთ საკუთარ თავსა და ღირსებას. არ აყვეთ პროვოკაციებს. მთავარია, პროცესი მივმართოთ იმისკენ, რომ ყველაფერი დალაგდეს. პროტესტის გამოხატვა ვანდალიზმით და სამართალდამცველების დაშავებით არც ერთ ნორმალურ ქვეყანაში არ რჩება დაუსჯელი. ცხადია, თუ პოლიციელების მხრიდან არის კანონის გადამეტება, არც ეს დარჩება დაუსჯელი. ამიტომ ვცეთ საკუთარ ქალაქსა და ქვეყანას პატივი. გთხოვთ, მოგიწოდებთ ანგარიში გაუწიოთ თქვენს თანამოქალაქეებს და დაიშალოთ. ქუჩებში სირბილი, კერძო საკუთრების დარბევა, პოლიციის შენობის შტურმით აღება დანაშაულია. კარგად გააცნობიერეთ ყველაფერი. დამშვიდდით და დაელოდეთ ხვალინდელ დღეს, მე თქვენ გვერდით ვდგავარ. ყველა ერთად უნდა დავდგეთ პროვოკატორებისა და უკანონობის წინააღმდეგ", - აღნიშნა ენერგეტიკის მინისტრმა.