ქსნის N 15-ე  პენიტენციურ დაწესებულებას  საქართველოს კათოლიკოს-პატრიარქი, უწმინდესი და უნეტარესი ილია მეორე და   სასჯელაღსრულებისა და პრობაციის მინისტრი კახა კახიშვილი ესტუმრნენ. 

როგორც „ექსპრესნიუსს“ სასჯელაღსრულებისა და პრობაციის სამინისტროდან აცნობეს, ილია მეორემ  წმინდა ნიკოლოზის სახელობის ტაძარი აკურთხა, რომელიც სამინისტროს თანამშრომლებისა და მსჯავრდებულთა მონაწილეობითა და  შემოწირულობებით  აშენდა.

უწყების ინფორმაციით, საქართველოს კათოლიკოს-პატრიარქმა N15 პენიტენციურ  დაწესებულებაში მყოფი მსჯავრდებულები  დალოცა და მათ  წმინდა ნიკოლოზის ხატი, ასევე, საქართველოს ერისა და ეკლესიის ისტორიის ტრილოგია აჩუქა.

 გარდა ამისა,  მისმა უწმინდესობამ, ილია მეორემ  საპატრიარქოს სიგელები გადასცა 125 მსჯავრდებულს, რომლებიც წმინდა ნიკოლოზის ტაძრის მშენებლობაში მონაწილეობდნენ.  

„დღეს არის ბედნიერი დღე.  ჩვენ ვაკურთხეთ წმინდა ნიკოლოზის სახელობის ტაძარი,  რომელიც ჩვენმა სულიერმა შვილებმა, პატიმრებმა ააშენეს. მათ გამოიჩინეს საოცარი სულიერი სიმაღლე  და ეს ბრწყინვალე ტაძარი აშენდა. ეს ტაძარი იმისათვის აშენდა,  რომ თუ იქნება ამის საშუალება,   აქ ყოველდღე წირვა-ლოცვა შესრულდეს.   მინდა დავლოცო ყოველი ადამიანი,  რომელმაც  მონაწილეობა მიიღო ამ ტაძრის მშენებლობაში და  ერთი აგური მაინც დადო. მინდა, ასევე,  დიდი პატივისცემით დავლოცო მინისტრი,  ბატონი კახი  და მისი თანამშრომლები, “- განაცხადა საქართველოს კათოლიკოს-პატრიარქმა. 

სასჯელაღსრულებისა და პრობაციის მინისტრის განცხადებით, წმინდა ნიკოლოზის ტაძრის მშენებლობა  დაწესებულებაში წელიწადი და 7 თვე გრძელდებოდა.

„ძალიან დიდი მადლობა მინდა გადავუხადო პატრიარქსა და საპატრიარქოს,  ვინაიდან ჩამობრძანდნენ და საზეიმო ვითარებაში გავხსენით წმინდა ნიკოლოზის ტაძარი.  რწმენა ყოველთვის აძლიერებს ადამიანს და  დარწმუნებულები ვართ,  რომ ჩვენი პატიმრები უფრო მეტად გაღრმავდებიან რწმენაში და ეს ხელს შეუწყობს  იმას, რომ  ისინი ძალიან მალე დაუბრუნდნენ საზოგადოებას,“- განაცხადა კახა კახიშვილმა.

სასჯელაღსრულებისა და პრობაციის მინისტრმა  საქართველოს კათოლიკოს-პატრიარქს ტაძრის მიმდებარე ტერიტორია, ეზო და სამრეკლო დაათვალიერებინა.

(NS) 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

დუმამ ბალტიისპირეთის ქვეყნები სსრკ-დან გამოყოფის შესახებ შეთანხმების დარღვევაში დაადანაშაულა

კობახიძე ერევანში ევროპული პოლიტიკური გაერთიანების (EPC) მე-8 სამიტში მონაწილეობისთვის ჩავიდა

რა მეთოდები გამოიყენება ჟურნალისტებისა და მედიის დისკრედიტაციისთვის

რეჟიმის მიერ წნეხში მოქცეული ქართული მედია - როგორ ხვდება ოცნების პირობებში პრესის თავისუფლების დღეს საქართველო