ომიხ მხარდამჭერი რუსეთის პატრიარქი ილია მეორეს ანგელოზის დღეს ულოცავს

2025-08-03 12:16:21, 2434 ნახვა

საზოგადოება

რუსეთის პატრიარქმა სრულად საქართველოს კათალიკოს-პატრიარქს ანგელოზის დღე მიულოცა. მისალოც წერილში კირილ I-მა ილია II ისევ არასრული ტიტულატურით იხსენიებს.

"უწმინდესი და უნეტარესი ილია II სრულიად საქართველოს კათოლიკოს-პატრიარქი, მთავარეპისკოპოსი მცხეთა-თბილისისა და მიტროპოლიტი ბიჭვინთისა და ცხუმ-აფხაზეთისა" - ამ სრული ტიტულის ნაცვლად კირილეს წერილში აღნიშნულია მხოლოდ "უწმინდესი და უნეტარესი სრულიად საქართველოს კათოლიკოს-პატრიარქი ილია მეორე".

იმის ხაზგასასმელად, რომ აფხაზეთი საქართველოს მართლმადიდებელი ეკლესიის კანონიკურ საზღვრებში შედის, წმინდა სინოდის 21 დეკემბრის გადაწყვეტილებით საქართველოს პატრიარქი ბიჭვინთისა და ცხუმ-აფხაზეთის მიტროპოლიტიც გახდა, რის შემდეგაც მისი სრული ოფიციალური ტიტულია: "უწმიდესი და უნეტარესი, სრულიად საქართველოს კათოლიკოს-პატრიარქი, მთავარეპისკოპოსი მცხეთა-თბილისისა და მიტროპოლიტი ბიჭვინთისა და ცხუმ-აფხაზეთისა“.

თქვენო უწმინდესობავ და უნეტარესობავ, უფალში საყვარელო ძმაო და თანამსახურო!

"გულითადად გილოცავთ ანგელოზის დღეს.

თქვენი ზეციერი მფარველის, ღვთის წინასწარმეტყველი ილიას, მფარველობით გამტკიცებული, თქვენთვის ჩაბარებულ სამწყსოს ღვთის მცნებების დაცვისა და მისი ყოვლად კეთილი განგების მტკიცე სასოების კარგ მაგალითს აძლევთ, ამტკიცებთ რა ჭეშმარიტ მრწამსს ადამიანებში და მოუწოდებთ, იბერიის უძველესი ტრადიციები დაიცვან.

თქვენ მრავალი ათწლეულების განმავლობაში აღასრულებთ თქვენს საპატრიარქო მსახურებას, დაუღალავად ზრუნავთ საქართველოს მართლმადიდებელ ეკლესიაზე, თავს იჩენთ სიმართლით, ღვთისმოსაობით, სიყვარულით, მოთმინებითა და თვინიერებით (პირველი ტიმოთეს მიმართ, 6:11).

ამ წმინდა დღეს თქვენი უწმინდესობისა და უნეტარესობისთვის განსაკუთრებულ ლოცვებს წარმოვთქვამ, რათა უფალმა საოცარი წინასწარმეტყველის შუამავლობით, რომელმაც განთიადით გონება გაანათლა (სტიქარონი წმინდანს), თქვენ წმინდა მართლმადიდებლობის საკეთილდღეოდ წინამძღვრულ საქმიანობაში ძალთა სიმტკიცე და უხვი დახმარება გიბოძოთ". - წერია განცხადებაში.