საქართველოს გენერალური პროკურატურის სამართალწარმოების პროცესში ჩადენილი დანაშაულის გამოძიების დეპარტამენტის ხელმძღვანელმა, ირაკლი ნადარეიშვილმა, „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი“ საქართველოს პარლამენტის დროებითი საგამოძიებო კომისიის სხდომაზე, წინა ხელისუფლების მაღალი თანამდებობის პირების მიერ ჩადენილ სისხლის სამართლის დანაშაულებზე ისაუბრა.

ნადარეიშვილმა ერთ-ერთ მაგალითად მოიყვანა დეპარტამენტის მუშაობის შედეგად, ყოფილი გენერალური პროკურორის, ზურაბ ადეიშვილის სამი სხვადასხვა სისხლის სამართლის საქმე, რომლებშიც, მისი თქმით, ადეიშვილი გამტყუნდა, „კერძოდ, ეს საქმეებია: ღვინის ქარხანა „აკურას“ იძულებით დათმობის ფაქტი, ტელეკომპანია „იბერიის“ იძულებით დათმობის ფაქტი და კობა დავითაშვილის თავისუფლების უკანონო აღკვეთისა და მასზე განხორციელებული ძალადობის ფაქტი“.

„გაცხადებული სახელმწიფო სისხლის სამართლის პოლიტიკის თანახმად და ამ დეპარტამენტის შექმნისთანავე დაანონსდა, რომ ის, ვინც ითანამშრომლებდა გამოძიებასთან, ხელს შეუწყობდა, აანაზღაურებდა ზიანს ნებაყოფლობით, ასევე, დაეხმარებოდა გამოძიებას სხვა, რთული და მრავალეპიზოდიანი საქმეების გახსნაში და გამოძიებაში, მათ მიმართ გამოყენებული იქნებოდა საპროცესო კანონმდებლობით გათვალისწინებული შეღავათები და სწორედ რიგითი საჯარო მოხელეების თანამშრომლობის შედეგად, ასე თუ ისე გამარტივდა და შესაძლებელი გახდა მაღალი თანამდებობის პირების მხილება.

თვალსაჩინოებისთვის რომ წარმოგიდგინოთ, დეპარტამენტის მუშაობის შედეგად, მაგალითად, ყოფილი გენერალური პროკურორი, ზურაბ ადეიშვილი სამ სხვადასხვა სისხლის სამართლის საქმეზე იქნა პასუხისგებაში მიცემული და დღეის მდგომარეობით, სამივე საქმეზე დამდგარია გამამტყუნებელი განაჩენი. შეგახსენებთ, რომ ესენი იყო ღვინის ქარხანა „აკურას“ იძულებით დათმობის ფაქტი, ტელეკომპანია „იბერიის“ იძულებით დათმობის ფაქტი და კობა დავითაშვილის თავისუფლების უკანონო აღკვეთისა და მასზე განხორციელებული ძალადობის ფაქტი. ღვინის ქარხანა „აკურას“ საქმე დეპარტამენტის პრაქტიკაში იქცა ერთ-ერთ ყველაზე თვალსაჩინო მაგალითად, როდესაც სახელმწიფო სტრუქტურები, მათ შორის, სამართალდამცავი ორგანოები, ერთმანეთთან კოორდინირებულად, შეთანხმებული მუშაობის შედეგად ახდენდნენ კერძო საკუთრებაში არსებული ქონებების მიქცევას სახელმწიფო საკუთრებაში“, - აღნიშნა ირაკლი ნადარეიშვილმა.

ავტორი: ექსპრესნიუსი,

სოციალური ქსელები

სადიგოვი - პუტინის მონამ, სამშობლოს მოღალატე ივანიშვილმა ჩემი საქართველოდან გაძევებით ძალიან დიდი დარტყმა მიაყენა საქართველოს

Freedom House - იდენტიფიცირებულია 6 ახალი სახელმწიფო - ავღანეთი, ბენინი, საქართველო, კენია, ტანზანია და ზიმბაბვე, რომლებიც იყენებენ ტრანსნაციონალურ რეპრესიებს

რუსეთის ქალაქ ტაგანროგში, სარაკეტო დარტყმის შემდეგ, დრონების მწარმოებელ ქარხანას ხანძარი გაუჩნდა

უკრაინის თავდაცვის ძალებმა ბოლო 24 საათის განმავლობაში კიდევ 1070 ოკუპანტი გაანადგურეს - გენერალური შტაბი