მდინარაძე - აქციაზე დაწვეს კუბო, რომელზეც მაცხოვარი იყო გამოსახული - ჩინელი დაახატავს თუ ქართველი, რა მნიშვნელობა აქვს

2024-12-11 15:23:09, 422 ნახვა

პოლიტიკა

ჩინელი დაახატავს მაცხოვარს და იმას დაწვავ, თუ ქართველი, რა მნიშვნელობა აქვს, რა გამართლებაა? - ამის შესახებ უმრავლესობის ლიდერმა, მამუკა მდინარაძემ ჟურნალისტებს განუცხადა, რითაც კიდევ ერთხელ გამოეხმაურა დემონსტრანტების მიერ კუბოს დაწვას, რომელშიც ბიძინა ივანიშვილის ფიტული იყო მოთავსებული.

მდინარაძის თქმით, აქციის მონაწილეებმა სპეციალურად დაწვეს კუბო, რომელზეც მაცხოვარი იყო გამოსახული.

„ჩინელი დაახატავს მაცხოვარს და იმას დაწვავ, თუ ქართველი, რა მნიშვნელობა აქვს, რა გამართლებაა? ისეთ თემაზე გვიწევს ლაპარაკი, უხერხულიც კი არის, მაგრამ მიცვალებულის სასახლეზე, კუბოზე, არც მახსოვს ასეთი რამე რომ ეხატოს, მე არ მახსენდება, ყოველ შემთხვევაში. სპეციალურად იყო არჩეული. ჩინური იყოო, თუ იაპონური, რა მნიშვნელობა აქვს? წამოიღეს და სპეციალურად დაწვეს ისეთი, სადაც მაცხოვრის გამოსახულება იყო, ანუ იმდენად მიზანმიმართულია.

არის 1-2% ამ ქვეყანაში, ეს სატანისტური რიტუალი რაღაც ე.წ პრადვინუტობაში რომ გააქვს, საკუთარ თავს რომ იმართლებს, რომ უფრო „სვეცკია“. კიდევ ერთხელ ბოდიში ამ სიტყვებისთვის, უფრო „პრადვინუტია“, თუ მაცხოვარს წვავ და მოგწონს, თუ დედას იგინება გოგო, საზიზღარ სიტყვებს ლაპარაკობს. ქალი, იგინება ბოლო სიტყვებით და ეს, მათი აზრით, არის „პრადვინუტობა“.

წარმოუდგენელი ამბავია. მერე გამოდიან ვიღაცები და „აკუმირებენ“ ისეთ ხალხს, დიდი ბოდიში ასეთ თემებზე რომ ვლაპარაკობ, ჯობია წყლის ჭავლს მაინც მიუშვირონ თავი. წარმოუდგენელი ამბავია. რაღაც ამ „სვეცკობას“, მათი აზრით, არც განათლება სჭირდება, არაფერი სჭირდება, არც აზრზე მოსული ადამიანი იყო, როგორც იტყვიან ხოლმე, არა, ეს არ სჭირდება, უბრალოდ დედას უნდა იგინებოდეს, რაღაც საზიზღარ სიტყვებს ლაპარაკობდეს, მაცხოვრის გამოსახულებიანი ნივთების დაწვას უნდა მიესალმებოდეს და ეს არის თანამედროვე... ეს არის უკიდურესი გოიმობა!“ - განაცხადა მდინარაძემ.