2022-06-22 13:14:30, 1586 ნახვა

---

EURACTIV – EU უკრაინისა და მოლდოვისთვის კანდიდატის სტატუსის მინიჭებას მხარს დაუჭერს, საქართველოზე კი ევროკომისიის შეფასებას გაიმეორებს

ევროკავშირის ლიდერები ბრიუსელში, სავარაუდოდ, უკრაინისა და მოლდოვისთვის კანდიდატის სტატუსის მინიჭებას მხარს დაუჭერენ, საქართველოს შემთხვევაში კი ევროკომისიის მიღებულ შეფასებას გაიმეორებენ,- ამის შესახებ გამოცემა EURACTIV მათ მიერ მოპოვებული ევროკავშირის სამიტის შეჯამების პროექტის მიხედვით წერს, რომელიც 21 ივნისით თარიღდება.

გამოცემის თანახმად, ევროკავშირის ლიდერები შემდგომ ნაბიჯებსმას შემდეგ გადაწყვეტენ, რაც ევროკომისიის მიერ გაწერილი ყველა პირობა სრულად დაკმაყოფილდება.

„ევროპულმა საბჭომ მიიღო გადაწყვეტილება, მიანიჭოს კანდიდატი ქვეყნის სტატუსი უკრაინასა და მოლდოვას რესპუბლიკას , სავარაუდოდ ამ განცხადებას გააკეთებენ ევროკავშირის ლიდერები ხუთშაბათს, 23 ივნისს ევროკავშირის სამიტზე შეხვედრისას.

ევროკავშირის ლიდერები, სავარაუდოდ, კიდევ ერთხელ დაადასტურებენ პოზიციას და განაცხადებენ, რომ ისინი „მზად არიან მიანიჭონ საქართველოს კანდიდატი ქვეყნის სტატუსი მას შემდეგ, რაც განიხილება საქართველოს წევრობის განაცხადის შესახებ კომისიის დასკვნაში მითითებული პრიორიტეტები. თითოეული ქვეყნის პროგრესი ევროკავშირისკენ იქნება დამოკიდებული მის დამსახურებაზე კოპენჰაგენის კრიტერიუმების შესრულებაში, მათ შორის ევროკავშირის შესაძლებლობებზე ახალი წევრების ათვისებაში“, - ნათქვამია დასკვნების პროექტში.

ამასთან, პირობების შესრულების შესახებ პროგრესის შეფასების პირველი ანგარიში მოსალოდნელია, როგორც კომისიის რეგულარული გაფართოების პაკეტის ნაწილი მიმდინარე წლის ბოლომდე.

„ქართული ოცნების“ მთავრობა მზარდი საერთაშორისო კრიტიკის წინაშე დგას იმის გამო, რომ აღიქმება უკანდახევა დემოკრატიაზე, რაც სერიოზულად აზიანებს თბილისის ურთიერთობას ბრიუსელთან”,- წერს მედია.

შეგახსენებთ, რომ ევროკავშირის აღმასრულებელმა ხელისუფლებამ 17 ივნისს უკრაინის კანდიდატის სტატუსის მინიჭების რეკომენდაცია გაუწია, რამაც ევროკავშირის ლიდერებს დაახლოებით ერთი კვირა დაუტოვეს დოკუმენტის შესწავლა ამ საკითხზე გადაწყვეტილების მიღებამდე.

ევროკომისიამ ასევე რეკომენდაცია გაუწია მოლდოვას კანდიდატის სტატუსის მიღებას, მაგრამ იგივე პერსპექტივა არ მიენიჭა საქართველოს, სანამ ის არ შეასრულებს დადგენილ პირობებს.

ორშაბათს, 20 ივნისს კი, პარლამენტის წინ აქცია „შინ ევროპისკენ“ გაიმართა. რუსთაველის გამზირზე შეკრებილ საზოგადოებას საზოგადო მოღვაწეებმა და ევროპარლამენტარებმა მიმართეს. 

დემონსტრაციის მონაწილეები ფარავდნენ ოპერიდან – გალერეა თბილისამდე ტერიტორიას. "ექსპრესნიუსის" დათვლებით, აქციაზე მინიმუმ 120 ათასი ადამიანი, მაქსიმუმ 135 ათასი ადამიანი იმყოფებოდა.  

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი