უნგრეთი მიგრანტების წინააღმდეგ ჯარს გამოიყენებს

2015-09-22 15:45:51, 1360 ნახვა

მსოფლიო

უნგრეთი მიგრანტების კრიზისის მოსაგვარებლად და მათზე კონტროლის გასაძლიერებლად ჯარს გამოიყენებს.

შესაბამისი გადაწყვეტილება ქვეყნის პარლამენტმა მიიღო.

ამიერიდან სამხედროებს პოლიციის დასახმარებლად არალეტალური იარაღის გამოყენება შეეძლებათ: რეზინის ტყვიების, ცრემლსადენი გაზის და კვამლის ყუმბარების.

გარდა ამისა, ჯარი მესაზღვრეებს ქვეყნის საზღვრების დაცვაში დაეხმარება და ხორვატიის საზღვარზე, საიდანაც მიგრანტები უნგრეთში შეღწევას ცდილობენ, კედელს ააშენებს.

როგორც პარლამენტში სიტყვით გამოსვლისას უნგრეთის თავდაცვის მინისტრმა იშტვან სიმიჩკომ განაცხადა, ჯარი ქვეყნის საზღვრებზე იარაღით ხელში დადგება, თუმცა იარაღს მხოლოდ მიგრანტებისგან თავდაცვისთვის გამოიყენებს.

შეგახსენებთ, რომ რამდენიმე ათეული ათასი მიგრანტი სერბეთსა და ხორვატიაში არის გაჩერებული. ისინი უნგრეთის გავლით შვედეთში, გერმანიას და ავსტრიაში გამგზავრებას ცდილობენ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან